成立已經16年嘅Dear Jane,終於一圓心願舉辦一連三場戶外表演,喺西九龍文化區竹翠公園嘅第二場演出除咗迫爆嘅歌迷之外,亦吸引咗唔少圈中人捧場。主角Dear Jane邀請咗 MC張天賦 擔任嘉賓,亦喺台上合唱《 無可避免 》,MC亦再獨唱HitM歌《老派約會之必要》。
Tim同MC合唱後笑住問:「你知唔知我點解請你做嘉賓?因為我好鐘意你呢個開心果,成日都有好多energy。」 而MC就話 : 「我想講《無可避免》呢首歌,係我中學時好鐘意嘅一首歌。你問我做嘉賓想唱咩歌,我即刻就想唱呢首,因為呢首歌嗰陣經歷,係中學個陣帶俾我好多回憶。」
阿Tim聽到就無奈笑道:「我同大家講,我搵佢嗰陣一早估到你會揀呢隻歌,佢喺電話話,唱《無可避免》啦,呢隻OK,唔駛練。」MC聞言狂笑,「唔係呀,邊有咁輕佻呀....我熟首歌之嘛...」MC之後就再獻唱自己嘅作品《老派約會之必要》,令現場觀眾過足癮呀。
首晚演出時Tim嘅囡囡因為不適,未及開場已經要回家休息,不過經過一日養精蓄銳之後,第二場又再同媽咪現身演唱會支持Daddy,仲整晚揮動螢光棒為Daddy打氣,阿Tim喺獻唱《Find My Way》 時,仲公開放閃將歌曲送予老婆,真係冧到暈呀。
登入後即可查看我的收藏
登入後即可查看瀏覽記錄