蘇師傅《開壇》教眼耳掌紋睇健康

蘇師傅喺嚟緊星期四播出嘅《呢鋪開乜:開壇》,會以「健康」作為主題同大家慢慢傾。 節目一開始,蘇師傅就要求4位主持人 倪嘉雯   陳欣茵 黃嘉雯 同 陳國麟 紮馬,測試佢哋嘅耐力,開頭佢哋睇落都姿勢十足,點知維持唔夠10秒情況就已經急轉直下,有人腳震仲有人要用手撐住借力。

原來師傅想知道佢哋嘅身體狀況,配合「健康」呢個主題,而Carmen話一般人會將「健康」等同「長壽」,師傅就解釋以前人生70古來稀,而隨住社會轉變所以會有唔同睇法,又話「長命嘅定義要跟社會形勢變」, 至於以前一直都講「耳珠大長命」,到底有冇根據呢?

師傅就話耳仔代表體力,耳朵大隻小朋友會特別頑皮,因為精力充沛。佢又讚Sonya小時候一定好聽話︰「因為你耳仔細隻體力唔夠,玩兩玩就攰,所以易教。」 而Doniven問到有冇辦法知道「臨尾嗰幾年」點過時,蘇民峰就話一樣有得睇,可以從雙眼嘅黑白分佈同眼神,大概可以睇到「臨尾幾年日子」點過。

師傅又糾正一般人對生命線的謬誤,原來長並非代表長壽,短亦唔代表短命︰「短係代表體質比較早衰退,每下愈況大病連年。」 今集亦會有觀眾提供掌相,請教蘇師傅生命線上有「島紋」要如何解釋,點知一講就發現4位J2ers都有同樣「島紋」,搞到大家驚呼連連。

蘇師傅話島紋同身體健康有密切關係,到底又係咩關係呢?而生辰八字亦可以睇出各人身體幾時同邊個部份出問題。節目又講到家居忌紅黑二色同何謂陰地?原來住喺陰地會影響身體健康,最慘是女士有機會嫁唔出,要知點樣趨吉避凶,就記住24號晚21:30睇實 J2 嘅《呢鋪開乜︰開壇》喇。

 相關推薦