超能使者丨王君馨演霸氣大家姐入型入格 超能兩對CP上演冧豬戲

台慶劇《超能使者》入面,Grace王君馨飾演身份一直成謎嘅黑幫大家姐韋瑞琦,由於同一班黑道「講數」時霸氣十足,令到唔只觀眾,就連監製Jazz文偉鴻都指Grace演得入型入格。對於演技備受讚賞,Grace表示好開心最近出街都有唔少途人叫佢做「韋小姐」,講到23號晚播出嘅一集,佢爭啲被揭卧底身份,雖然最終可以力挽狂瀾,但就令情同父女嘅張Sir不幸身亡,Grace坦言呢集嘅情緒變化非常難演:「呢集瑞琦心情非常矛盾,所以喺演繹上,最困難係情緒轉變同心境變化,幸有兩位非常之好嘅前輩林偉哥同瑞偉哥喺度,令我好易就入戲。」
Grace霸氣十足Grace霸氣十足因為未能救返林偉已痛哭因為未能救返林偉已痛哭
另外呢晚劇入面嘅兩對CP,唐詩詠飾演嘅Q姨、陳展鵬飾演嘅阿鏈,同埋劉穎鏇飾演嘅Open姐、陳山聰飾演嘅高勇,就有不同甜度嘅糖水餵畀觀眾。先嚟係bittersweet嘅Q姨同阿鏈,佢兩個因為要氹程可為飾演嘅鏈媽開心而假扮夫婦,之後Q姨仲誤會阿鏈暗戀自己而主動獻吻兼表白,但最終慘食檸檬。之後有十分甜嘅Open姐同高勇,被困在冰櫃嘅佢哋,由於要取暖而要攬到實,Open姐仲撒嬌講疊字:「抱抱!攬實啲!凍凍呀!」之後仲加埋個冧豬Kiss閃盲觀眾,唔知呢集出街之後,山聰嘅仇恨值會唔會急升呢?

Tiffany嘅fans小心服用。Tiffany嘅fans小心服用。
劉穎鏇接受訪問時就話私下嘅自己比較男仔頭,所以從來未試過講疊字同咁樣撒嬌,佢話拍嗰陣都有啲尷尬同怕醜呀,不過講到同山聰嘅Kiss戲,劉穎鏇反而話因為同對方合作過幾次,已經熟到唔會尷尬呀!

台慶劇《超能使者》星期一至五 21:30 翡翠台

 相關推薦