江嘉敏被爆飛車技術大膽 何廣沛何慈茵為籌款凌空爆砂煲

《歡樂滿東華2022》於12月3號舉行，為咗籌得更多善款，一眾藝人紛紛向高難度挑戰，屆時傾力共襄善舉，對慈善不遺餘力，郭柏姸、何泳芍、廖慧儀、江嘉敏、何慈茵、吉天祥、羅浩銘、何廣沛及「三姐」蕭秀香呢日出席活動預告各人表演項目。

江嘉敏夥拍動作演員羅浩銘享受飛車飄移夠刺激，雖然佢哋冇透露詳情，不過佢哋好有信心透過呢個項目籌得更多善款，江嘉敏坦言從未試過飛車，羅浩銘更大爆：「佢揸車同佢個人一樣都係咁大膽。」

何慈茵則率領幾個藝人表演凌空爆砂煲，古天祥同何廣沛要舉起何慈茵踢砂煲，拍檔們要相當有默契，吉天祥笑言：「其實成個項目最難就係夾我哋嘅默契，打爛砂煲都唔算難。」何廣沛自言做「精神領袖」，負責為眾人打氣。

郭柏姸、廖慧儀 、何泳芍及葉靖儀挑戰花式滑板，演出難度頗高，連之前喺台慶劇《下流上車族》經常踩滑板嘅「芊芊」郭柏姸都話要重新學習，郭柏姸指呢次考驗速度感：「個個以為我應該識，反而學咗我嗰款滑板再學呢款係完全有衝突，完全唔一樣，我嗰款用腰力多，呢個就係速度感較多。」何泳芍亦覺得有啲難消化，每次練習都有三、四個新技巧要學。

廖慧儀稱之前佢哋練習嗰陣都有仆親，傷手踭擦傷咗，暫時都唔知自己最後表演係做啲咩，佢哋目前先係練吓直線，同試吓每堂學嘅新技巧。

李芷晴同余思霆屆時瞓喺浴缸抵冷浸冰水接受不同challenge，譬如即場獻唱，又要搵嘢、玩「獎門人」遊戲等；「三姐」蕭秀香則為慈善炮製「拿手菜」豬腳筋、芝麻卷及滷水拼盤等，誠邀大廚好友助陣。