/public/article/images/202211/0b2326b4-694b-4147-b8aa-1a4d7c73d9f1.jpg)
由黃偉聲監製《輕．功》，將緊接台慶劇《超能使者》，逢星期一至五晚九點半翡翠台播放，演員陣容包括黎耀祥、龔慈恩、蔣祖曼、朱晨麗、朱敏瀚、鄭子誠、歐瑞偉、韋家雄、寶珮如、王綺琴及楊卓娜等。
被選為《2022年香港國際影視展》推介劇集之一嘅《輕．功》，幕後班底不容忽視，無論係監製聲哥或是編審龍文康均係「言情」高手，佢哋更係《老表》系列黃金組合；聲哥除咗《學警》及《老表》系列，亦係去年叫好叫座台慶劇《換命真相》監製，至於龍文康參與過電影編劇作品則包括《門徒》、《野．良犬》等，其聯合編劇嘅電影《樹大招風》，更榮獲第53屆金馬獎最佳原著劇本，及第36屆香港電影金像獎最佳編劇，實力不容忽視。
《輕．功》故事講述一代當紅女星繆妙（龔慈恩飾）嫁前武師洪十一（黎耀祥飾）後息影，專心相夫教子，兩公婆多年來人前人後均表現恩愛，劇集一開始，繆妙便因患病時日無多，喺倒數日子，十一竭盡所能、強忍傷痛陪伴積極抗病嘅愛妻走完人生最後旅程，其間更與一眾好友落力為繆妙完成「飛」嘅心願...「輕功」就係一種學懂放「輕」自我的人生「功」課，像劇中男女主角黎耀祥及龔慈恩，一個要面對「喪偶」，一個要面對「離世」，兩個都係人生重要課題，尤其面對「喪偶」嘅十一往後日子仲要繼續，最終又點樣學會釋懷及放下？
日前《輕．功》釋出首個劇集宣傳片，以「100個人，100種共鳴」作宣傳重點口號，配以黎耀祥充滿感情嘅VO「放輕自己，做人唔再咁執著」及「輕功係一種活得自在嘅生活態度」，為一連二十五集嘅「輕功人生課堂」揭開序幕。
近年維持一年一劇嘅祥仔，是次角色再見突破，由於劇情發展偏向生活化、冇太多戲劇元素，隨住發人深省嘅人生哲學式對白，無論劇情或人物性格自然流暢，對於演員演技自然係大考驗，而祥仔呢次除咗要應付內心戲，更要飾演比自己真實年齡成熟嘅角色，難得佢全程均演繹得入型入格，大大增加劇集真實感。
至於出名保養得宜嘅龔慈恩，是次不但要飾演病重嘅繆妙，現年59歲嘅龔慈恩仲要分飾年青時風華絕代嘅繆妙，龔慈恩受訪時感激監製同編劇為佢創造呢個角色：「繆妙係我從演以嚟最討好嘅角色，喺佢死咗之後仍得到好多人嘅愛，呢樣好難得。至於劇裏面演後生版要經過好多團隊嘅幫忙，包括攝影、燈光、化妝、後期製作等，好多謝大家幫我塑造呢件事。」
龔慈恩特別感激祥仔鼓勵佢放開去演：「我有啲古板啲嘅觀念，一把年紀要演啲比較恩愛嘅場口，唔係好放得開去做，好多謝導演同祥哥一直鼓勵我放開去演，同埋依家年代唔同，喺街上好多退休夫婦都好Sweet，其實不論咩年紀，兩夫婦都應該去互相痛愛對方，呢個先係正確嘅態度。」
談到劇中有唔少古裝造型及吊威吔場面，龔慈恩笑言從未抗拒吊威吔：「不嬲都覺得幾好玩，反而擔心某啲動作做得比較笨拙，始終依家年紀大，未必做到佢哋要求，但今次表現都OK。」龔慈恩續透露最愛白色系的古裝：「我幾鍾意演古裝，以前試過喺幾個月內演晒人、鬼、神三種唔同古裝角色，仲要同一時間都係着白色衫，感覺都幾特別。」
《輕．功》 逢周一至五晚九點半翡翠台播映
