香港史上首個男男配對真人騷《仔仔一堂》下周一(11月28號)喺J2首播，由王賢誌（Vinci）監製及主持，節目搵嚟10位各有特質嘅出櫃型男參賽，呢日拉隊宣傳睇試片。

退出幕前多年嘅好友劉曉彤前來捧場，節目喺舊年開拍，一直有傳因為話題敏感而不見天日，而家終於可以推出，令Vinci鬆一口氣，Vinci自言比生仔更辛苦：「因為生仔係懷胎10月，有時7個月都搞掂，做一個咁破天荒、咁破格嘅真人騷，原來真係要咁多時間，由搵參加者到一路拍攝嘅過程，每一個橋段嘅構思，到最後完成晒拍攝，後期又係點，做監製真係要好上心，每一集起碼超過睇100次。」Vinci希望做得盡善盡美，執得好啲。

對於該節目被批自肥，Vinci大方稱與一眾參加者早已認識：「大家好熟，10個仔仔同我變咗好friend，大家好多聚會，邊個生日又會一齊搞大食會，我另一半Kevin都有出現，佢哋都好熟。」Vinci又指另一半Kevin並冇監場，只係有時前來探班，而Vinci亦提早作出心理輔導，眾參加者樂意接收不同負評，大家均有心理準備，望同志得到更多認同。

今年初 J2 推出旅遊節目《自然系女子旅行》，搵嚟台灣三大女神林襄、張雅涵同黃上晏坐鎮，引起唔少話題，有見及此J2 乘勝追擊，誠邀台灣女神林莎拍攝新一季《自然系女子日本旅行》，佢將會同節目主持 暉哥 林映暉玩轉日本！
暉哥同林莎已經出發咗去日本拍攝。林莎喺IG share咗唔少靚相。林莎有 台版三上悠亞 之稱。
有台版三上悠亞稱號嘅林莎，憑住甜美臉蛋加上 32D嘅身材，IG 有近100 萬 followers。對於將會加入新一季《自然系》嘅拍攝，林莎直呼非常期待：「因為平常工作很忙碌，能親近大自然的機會滿少的，我通常去日本也都是去都市，每次看到照片中的日本自然景觀，都很期待有一天可以親自前往！」自言好鍾意浸溫泉嘅林莎，仲預告喺節目入面佢哋將會去到石川縣體驗當地嘅溫泉，令佢相當期待。
暉哥同林莎喺日本玩得好開心。
而再次冧莊做主持嘅暉哥，就多謝團隊畀機會自己，亦非常感謝觀眾嘅支持，暉哥話帶望嚟緊會有機會帶大家去其他國家旅行。講到嚟緊會同女神林莎合作，暉哥就話自己都係對方嘅follower，所以佢對呢次合作都超期待，暉哥仲笑言：「希望之後如果再開新一季，可以再請多啲我嘅女神，畀我認真工作之餘，同時可以圓夢！」
佢哋仲開live講呢幾日拍攝嘅趣事。
雖然節目仲拍攝緊，但林莎同暉哥已經急不及待，喺J2嘅社交平台開直播同大家分享當地經歷，身處日本北陸地區嘅兩人大讚當地風景優美，仲話此行食咗唔少美食。林莎仲連環晒廣東話「我識聽唔識講啦」、「食飯喇」、「好好食」、「我好鍾意你」，之後又話自己好鍾意香港：「去過香港十多次，我會自己無聊地坐飛機去香港吃東西，我很愛香港食物，好像燒臘和各種港式點心！」氹得一眾fans勁冧。