郭柏姸獲封踩板界女神 邵珮詩被選中做高難度跳躍

郭柏姸、邵珮詩、何泳芍、廖慧儀及葉靖儀呢日換上運動裝，為《歡樂滿東華》排練滑板項目，佢哋拎住滑板不斷練習，見到佢哋一身「重裝備」，何泳芍坦言因貪靚一開始冇戴護膝同護踭，直至不慎跌親，大家先開始做足安全措施。

邵珮詩本身有跳舞底子，佢指今次被選中做一啲高難度嘅跳躍動作，目前要多啲時間練習，希望可以籌到多啲善款，何泳芍爆導師見佢哋不斷進步，即加碼叫佢哋學新招式變得越來越難，暫時仍未到要做啲咩。

郭柏姸喺台慶劇《下流上車族》成日踩滑板，獲網民封為踩板界女神，郭柏姸坦言排練嘅滑板同佢之前學嘅完全唔同，之前嗰塊板係要用腰力，現時用呢塊係講速度感多啲，郭柏姸目前處於學習階段，佢為自己定下目標，學齊3款滑板，遲啲想學埋長板。

郭柏姸獲《萬千星輝頒獎典禮》三項提名「最受歡迎電視女角色」、「最佳女配角」、「飛躍進步女藝員」，佢自言冇諗過有提名，反而最希望《下流上車族》奪最佳劇集好有信心。