炎明熹與周筆暢隔空對唱 鍾柔美詹天文與虛擬人物共舞被考起

汪明荃、炎明熹(Gigi)、曾比特及《聲夢傳奇》兩代畢業生呢日現身生生不息25周年音樂會，炎明熹與周筆暢仲會隔空對唱，而鍾柔美(Yumi)、詹天文(Windy)、潘靜文及文凱婷更要挑戰同虛擬人物共舞。

炎明熹坦言最大難度係配合視覺畫面：「我要望住三塊玻璃去唱，我又驚望住玻璃好似成塊面扭咗過去，鏡頭就捕捉唔到，眼白位太多，呢個真係要好識就住嘅工作，希望帶畀觀眾新鮮感。」炎明熹出道短短時間已人氣爆燈，喺台慶頒獎禮更憑《青春本我》獲4項提名，炎明熹得知此事表示好驚訝，一度唔敢相信，估唔到連演員獎都有提名，佢覺得喺《青春本我》學到好多嘢，而且係全部《聲夢傳奇》學員嘅回憶，炎明熹稱對手太強，對奪獎欠缺信心。

冼靖峰(Archie) 同何晉樂(Rock)亦憑《青春本我》有份角逐獎項，Archie坦言獲提名已經係贏咗，Rock覺得有幸獲獎，應該跟《聲夢傳奇》15人分享，佢解釋雖然首歌係佢同Archie二人合唱，不過故事係佢哋15個人一齊創造出嚟。

Yumi、Windy、潘靜文及文凱婷將與虛擬人物共舞，佢哋覺得好突別，文凱婷笑稱「對手」好強勁，同佢夾過咁多次都未試過甩step，所以佢哋四個要更加努力演出。

此外，曾比特希望喺香港開騷，屆時想邀請同門歌手Kerryta及DEZ出合唱歌。