Serrini(梁嘉茵)同林家謙老友鬼鬼，嚟緊一齊合作做主持，不過呢日Serrini出席另一活動時，佢話為呢件事差啲同林家謙「反目成仇」，二人因寫稿開火，笑稱佢哋已打開「戰幕」，對此事忍耐以久。

Serrini好著重寫司儀稿，相反林家謙覺得冇問題實搞得掂，仲叫Serrini唔使驚，結果令Serrini嬲咗，講到今年入圍「我最喜愛女歌手」五強，Serrini坦言心情複雜又矛盾：「目前處於一個想拉票同唔拉票嘅中間，我係一個自我矛盾嘅人，雖然我好喜愛我自己，我又唔會逼呢個城市嘅人去喜愛我，我覺得你哋嘅喜愛可以化為選票鍾意其他人都得。」Serrini笑指必定要成為林家謙心中「最喜愛女歌手」，原來有日Serrini同林家謙講已投票畀佢，但林家謙居然冇反應。

Serrini下月將跟王菀之開騷，兩位音樂才女首次合作，更以7位數字打造M字型舞台，Serrini好緊張呢次音樂會，開騷前落足工夫準備，絕對係事業生涯最大挑戰!

去年表現亮眼年初更喺電台頒獎禮連奪多個大獎嘅 林家謙 ，近日喺另一電台嘅頒獎禮入圍名單中芳蹤杳然，不過呢日佢現身一個公開活動時，就指根據大會規則自己歌曲的確未能入圍，所以未獲提名係預計之內，尊重主辦機構取向。

而早前歌神 許冠傑 曾指對佢非常欣賞，仲點名想同佢合作，呢日佢就話非常多謝前輩嘅讚賞，不過就暫未收到邀請，仲話非常祟拜歌神嘅作品呀。4月同樣會舉辦慈善演唱會嘅佢，日前踩入老友 Serrini 母校擔任晚宴嘉賓，不過問到想唔想同對方一齊現身時，佢就即時耍手又擰頭喇。