中年好聲音丨李泇霖首奪得5盞燈感動爆喊 周吉佩獲鼓勵：對自己有信心

TVB推出全新綜藝歌唱真人騷《中年好聲音》噚晚（27日）起首播，逢周日晚九點半於翡翠台播映，並由車婉婉擔任主持，評審團則為Maria Cordero（肥媽）、張佳添、伍仲衡、林志美、周國豐。

呢集進行第一回合比賽，100強參賽者以盲選形式作賽，五人評審團憑「好聲音」撳燈，揀選出50個晉級人選；得到4盞或5盞燈嘅選手可以直接晉級，50強扣除得到4、5盞燈嘅剩餘名額，要留待評審團喺獲得3盞燈嘅選手當中揀出，只得到2盞燈或以下嘅選手則被即時淘汰，節目同時宣佈最終奪得《中年好聲音》冠軍嘅參賽者，將獲安排主唱TVB劇集歌曲。
呢集雲集多位唱得之人，共有11位參賽者奪得4盞燈或以上直接晉級五十強，當中有3人獲得五盞燈滿分成績，分別為李泇霖、周吉佩及鮑聖光。42歲李泇霖獻唱《情人知己》，天生靚聲嘅李泇霖成為首位奪得5盞燈嘅選手，李泇霖激動爆喊：「我由細到大唔係攞F，而係攞U嘅人，我讀書唔叻、細個好肥，一直以嚟冇乜信心，好多謝《中年好聲音》畀機會我唱歌畀大家聽。」張佳添送上鼓勵：「你完全唔使為你身形感到自卑，你睇吓Adele，全世界最紅嘅歌手，佢當年仲肥過你！」周吉佩獻唱《如果沒有你》同樣獲得5盞燈佳績，佢喺15年前曾出道做歌手，惟喺籌備出第二張唱片時，公司因財政問題煞停計劃，令佢個歌手夢幻滅，周吉佩坦言做歌手呢條路好辛苦：「呢15年浮浮沉沉，發展得好唔順利，有人問過我會唔會去做主持，但嗰時細個梗係想音樂行先，我話要唱歌，同嗰邊監製講唔做主持。」肥媽以自身經歷鼓勵佢並大拋金句：「有啲嘢唔使咁執着，我唱唱吓歌人哋叫我煮飯添，要對自己有信心，無論做咩都好，只要一日唔離開呢個舞台，一日都有機會！」

至於64歲鮑聖光係年紀最大嘅參賽者，身為靚聲王嘅鮑聖光深情獻唱《倩影》，一開口唱歌已震懾一班評審，齊齊露出驚訝表情，佢僅獻唱25秒便成功俘虜5位評審撳燈，成績斐然。伍仲衡大讚好有感染力：「唱到入我個心，呢首歌同你把聲有一個Magic！」林志美則說：「你唱第一、二句，我哋已經有嘩嘅感覺。」

另外直接晉級50強嘅參賽者，包括譚依婷、龍婷、蔡穎秋、陳樂平、羅金榮、梁浩銓、曹敏寶及顏志恒，至於有「屯門娜娜」之稱嘅董幸兒表現麻麻，獻唱《風的季節》時掛住擺Pose搞到數度忘詞，張佳添聽到擰晒頭，肥媽更狠批：「你諗嘅嘢多咗，你點會記得歌詞，淨係掛住個Pose。」最終獲得0盞燈被即時淘汰。

《中年好聲音》逢周日晚九點半翡翠台播映