鄭嘉穎同陳凱琳(Grace)於2018年喺峇里結婚,成功四年抱三,Grace今日喺IG分享影片,宣佈再懷孕,陀第三胎,3歲大仔鄭承悅(Rafael)及2歲嘅細仔鄭承亮(Yannick)榮升做哥哥。31歲陳凱琳月初出席馬場活動,當時有傳媒見到佢肚凸凸,追問佢係唔係有咗,今日終於公佈好訊息,Grace暫時未有公佈第三胎性別,指再次懷孕係世上最珍貴嘅禮物,又指生命係難以預料,好興奮同大家分享快樂,家庭準備變更大,亦感謝大家嘅祝福,一家人都急不及待想見到BB。