姚焯菲盼能演陳瀅女兒 張馳豪淚腺發達自認喊包

Chantel姚焯菲同Aska張馳豪一連兩場嘅音樂會圓滿結束，兩人喺尾場大派福行，唱跳之餘仲自彈自唱英文歌，Aska彈結他嗰陣仲除咗件外套騷出強勁嘅臂彎，睇到fans係咁尖叫。

呢晚佢哋就請咗Aska喺劇集《美麗戰場》入面嘅初戀陳瀅嚟做嘉賓，原來陳瀅係Chantel嘅偶像，呢晚Chantel仲追問《美》劇幾時開拍下一季，陳瀅即時順勢反問Chantel，如果開拍佢係咪會參演？點知Chantel就指住Aska同陳瀅，話如果實係有第二季，佢希望可以演佢哋個女，搞到陳瀅喺台上笑到收唔到聲。

第一次做演唱會嘉賓嘅陳瀅，就自爆因為曾經應承過好姐妹何雁詩，會將佢做演唱會嘉賓嘅第一次獻畀對方，所以當何雁詩知道陳瀅為咗做Aska同Chantel嘅音樂會嘉賓而反口時，就爭啲搞到佢同好姐妹反面呀！

呢晚音樂會仲請嚟Sherman潘靜文做嘉賓，喺台上Aska多謝Sherman一路以嚟嘅陪伴時仲講到眼濕濕，搞到曾經傳過緋聞嘅佢哋氣氛頓時添上一份曖昧呀。

騷後Aska、Chantel同Sherman一齊接受訪問時，Chantel就自爆其實完騷後自己喺後台都忍唔住喊，Sherman都話見到Chantel爆喊當下，一度擔心對方係咪有咩唔開心，但之後就知道對方只係唔捨得個騷咁快完。而自認喊包嘅Aska，就話講到啲感情嘅說話，又或者家人同朋友嘅支持，佢都會忍喊住呀。