超能使者｜異能失效後遺症浮現 KC復仇槍手襲擊高勇有不測？

台慶劇《超能使者》當中因為一場車禍而原因不明咁得到驚世異能嘅主角，慢慢浮現一大堆「副作用」繼28號一集阿鏈 陳展鵬 驚現「老樣」、瞬間滿頭白髮兼一臉皺紋後，29號嘅一集佢同高勇 陳山聰 嘅異能後遺症亦逐步浮現，繼可以「停頓時間」同「時間倒流」超能力嘅阿鏈急速衰老，腰痠背痛之餘仲因嚴重白內障致雙目失明，而異能也間歇性失靈。

連擁有「刀槍不入」超能力嘅高勇，早前累積嘅傷患都同時發作，極級痛楚仲令佢失去理智，擸刀自殘仲誤傷Open姐 劉穎鏇 同高守 林子善 。但係最無奈之處，係呢啲異能後遺症連Q姨 唐詩詠 都無法治癒。

而另一邊廂，賀慶隆 歐瑞偉 為子復仇之戰如箭在弦，當一班「超能使者」為袁叔 張國強 慶生之 際，眾人腦中同時閃現遭大批蒙面人持槍伏擊嘅畫面， 今日TVB嘅社交平台釋出全新預告片 https://www.facebook.com/tvbcom/videos/1517557902058231 當中就揭露喺袁叔飯堂槍林彈雨的驚險戰況，而及時趕到「幫拖」嘅阿鏈再次異能失靈，惟有憑「實力」對抗、將兇徒撲倒又攬著對方撞爆玻璃，場面震撼。

同樣異能失靈嘅高勇同樣亦自身難保，喺最新宣傳照中，見到高勇為救Open姐而身中多槍又噴血，之後Open姐同高守亦紛紛痛哭流淚，處於劣勢嘅「使者」們到底會點自救呢？

因為表達急速衰老嘅情況，展鵬就透露每次化「老人妝」都要耗費兩、三小時，拍攝時仲因正值炎夏，一出外景拍攝要諗辦法Keep住降溫，佢話：「真係好考內功，我要保持心靜自然涼，仲要預備啲風扇吹住塊面，未埋位又要即刻上車涼冷氣。」

不過展鵬認為最麻煩係卸妝，因為皺紋效果是係膠水黐出嚟：「個妝要用熱水慢慢落成個幾鐘，一急就會扯損啲皮膚，但最緊要出嚟效果好，辛苦都值得。」至於3歲嘅女兒「小豬比」陳諾瑤有追睇爸爸喺《超能》嘅演出，仲大爆囡囡頻頻模仿「停頓時間」同「時間倒流」絕技呀。展鵬仲笑言︰ 「一家人仲要配合佢扮定格，有時我哋想抱佢，佢唔畀抱就『停』我哋，幾搞笑。」

 

喺劇中因為後遺症發作，痛到青筋暴現兼標冷汗嘅山聰，就話拍攝呢啲畫面比拍打鬥戲仲花 氣喇力：「因為要谷到啲筋爆晒出嚟係需要好大氣力，拍完嗰場戲我都頭暈咗好耐。」講到擸 刀自殘同發狂襲擊Open姐同高守一幕，佢就話由於要喺狹窄嘅「高家」四處亂撞，拍攝期間撞到成手都係瘀傷，講到展鵬早前喺社交平台開Live大爆有異能人會離世，山聰就大賣關子喇︰「想知高勇會唔會刀槍不入到最後，定係會有突破性發展？大家就要繼續睇落去喇。」