古巨基爆囝囝愛唱歌跳舞 透露明年有意開演唱會

自從囝囝出世之後，古巨基已經有3年冇公開演出，難得呢日佢同MC張天賦、陳蕾等現身音樂活動兼上台獻唱。呢晚基仔接受訪問時，第一句同大家講嘅都係：「好耐冇見，好耐冇同大家見。」佢仲講笑話拎住咪接受記者訪問嘅情景彷如隔世，加上已經有幾年冇踏上舞台同見傳媒、觀眾等，一切都令佢好掛住。

問到之後會唔會做返多啲演出？基仔即刻為樂迷帶嚟好消息，佢話大家都見到佢一路有啲歌出緊，而專輯亦完成咗大半，至於會唔會開演唱會？基仔就話要睇下啲場地嘅檔期喇。至於講到囝囝，基仔即刻成個慈父樣出晒嚟，仲話而家囝囝識跑識玩仲識曳曳，佢又話畀片囝囝睇，對方都會跟住唱歌跳舞，基仔話成個感覺好特別。問到會唔會喺唱歌跳舞方面對囝囝加強訓練？基仔就係表示唔需要特別加強訓練，因為囝囝只要鍾意嗰樣嘢就會不停做，好似最近佢鍾意唱歌，就會連沖涼嗰陣都會邊沖邊唱。

MC嘅助手早前為咗幫MC喺頒獎禮拉票，而喺網上發表嘅不當言論，對此呢日MC就為對方解釋，話助手只係擔心自己唔能夠入圍，所以先會講咗啲令人唔舒服嘅字眼，MC又話同對方溝通過後，對方已經承諾會作出改善。

呢晚本身為Dear Jane擔任嘉賓嘅陳蕾，因為Dear Jane有成員中招而臨時缺席，令到呢晚陳蕾要一個頂晒，佢就話一切都係為大家健康安全着想，陳蕾又笑言呢晚自己多咗個新名，叫「Dear ​​Panther」呀！