全新旅遊節目《45日環遊日本》由張寶兒、姜麗文及蔣家旻輪流擔任主持,跟住「旅遊達人」項明生由北海道南下玩至鹿兒島,喺45日內走訪25個縣及近百個名勝景點,為觀眾提供熱門旅遊資訊之餘,奉上冷門小知識,讓大家對疫後日本有更全面了解。
噚晚播出呢集繼續由張寶兒(Bowie)擔任做主持,展開為期6日嘅日本東北之旅。Bowie參與東北最熱鬧嘅三大祭典,包括青森睡魔祭、秋田竿燈祭及仙台七夕祭,接連體驗巨型睡魔燈籠巡遊、高掛竿燈燈籠習俗及色彩繽紛嘅彩幡文化,場面熱鬧。
東北除咗有熱鬧嘅祭典,其實亦有寧靜嘅一面,Bowie喺被列入「國家特別名勝與天然紀念物」嘅奧入瀨溪流欣賞青苔,之後去陸奧小京東參觀華麗嘅武士屋敷,接着再換上大正時代嘅服飾漫步銀山溫泉,最後佢哋去到山居倉庫、邊嘆美食邊欣賞酒田舞娘表演,費用只需5,500日圓(約303港元)相當抵玩。最後一站去到立山黑部參觀黑部水壩,想去黑部水壩一啲都唔簡單,足足轉乘六種交通工具先到達,但能見識到水壩泄洪嘅雄偉氣勢,咩都值得啦!
至於今晚嗰集將由姜麗文(Lesley)接力,展開為期10日嘅瀨戶內之旅。Lesley第一站參加德島阿波舞祭,Lesley同項明生學咗10分鐘阿波舞便要上台表演,出道14年嘅Lesley笑言:「我諗除咗《好聲好戲》,呢個真係最緊張!」過程十分過癮,晚上佢哋再欣賞逾千人參與嘅「總舞」表演,逾千人「神同步」跳阿波舞,畫面相當震撼。
之後Lesley一次過體驗香川縣四大名物,參觀咗16個東京巨蛋大嘅栗林公園及擁有逾千級樓梯嘅金刀比羅宮,以及大歎美食骨付雞及讚岐烏冬;正所謂「自己烏冬自己整」,Lesley跟着70歲老師學整烏冬,大家一邊跳舞一邊整烏冬,Chill到飛起,Lesley更獲老師大讚人靚聲甜,逗得Lesley非常開心。
是集最後一站,Lesley開啟文青Mode參加三年一度嘅瀨戶內國際藝術祭,以「跳島」方式遊勻直島、豐島、小豆島,包括朝聖著名草間彌生紅南瓜、人生必去嘅豐島美術館及於電影版《魔女宅急便》取景地打卡,展開療癒之旅。
《45日環遊日本》逢周四及周五晚10點半翡翠台播映