由王賢誌(Vinci)監製及主持J2全新綜藝真人騷節目《仔仔一堂》,逢周一至五晚十點半J2(82台)播映,噚晚(2日)嗰集嘉賓係馬詩慧(Janet),佢大方分享由抗拒到接納女兒王曼喜係同性戀嘅過程。Janet指作為一個幾傳統嘅媽咪,佢係想小朋友結婚生仔,Janet回想:「初頭係我Sense到,佢喺美國返嚟放暑假,我成日見到佢用電腦同個女仔傾偈,我就問佢,佢初頭唔認,直至有一日佢就話『係呀,我係鍾意女仔』,我剩係同佢講『我諗你睇定啲先啦,遲啲你可能鍾意番男仔』。」
主持Vinci聞言大表詫異,並追問Janet係咪因事情發生喺自己女兒身上先難以接受,此時Janet接著說:「冇錯,我好多同志朋友,我覺得佢哋好Nice、好Talented。」Janet後來全靠一個「窿」令自己想通,過程更係相當神奇,Janet有次去做Massage,嗰張床有個窿,當時有人同佢要開始去接受,因為呢樣嘢會影響到佢同阿女嘅關係,Janet忽然想通咗,應該讓阿女有自己嘅生活,擁有自己愛嘅人,有自己嘅選擇。老公王敏德對於阿女係同志身份欣然接受,反而王敏德最接受唔到係阿女打扮性感,有時嫌阿女啲裙太短、衣著太低胸等,Janet坦言接納女兒同志身份後,全家關係變得更為密切,王曼喜伴侶已成佢哋嘅家人,感覺好Warm,Janet認為仔女搵到自己嘅愛係最緊要:「當你睇到阿女搵到鍾意嘅人,呢個係一個Blessing。」Janet真摯嘅心聲,令在場所有仔仔大為感動,頓時眼濕濕。仔仔亦輪流分享自己與家人嘅關係及故事,喺節目中人氣高企嘅Andrew,講到母親多年來一直未能接受自己同志身份,Andrew感到難過:「我媽咪覺得我個Gay Identity,係我唯一嘅Identity,儘管我讀書叻,我搵到工,但我係Gay,咁都唔夠好啦!」Juzco同樣未能獲取父親支持,佢全靠一手湊大自己嘅嫲嫲給予支持同力量,樂觀地繼續追求真我,Juzco說:「我爸爸喺我讀中學時,突然之間拉我埋一邊問我係咪鍾意男仔,佢話『如果你係,我可以帶你睇醫生』。嗰時我好驚,我讀緊中二、中三。我知佢背後接受咗好多閒言閒語,對佢嚟講係唔開心或者壓力。」至於Ray及HoHo亦分別獲得家人無限量支持,真性情嘅HoHo全靠母親嘅愛先多次走出「自我懷疑」呢個黑洞,數度哭成淚人,場面感人。
《仔仔一堂》以「絕不歧視愛情」為中心思想,找來十名外型、學歷及事業等條件不俗的仔仔參與拍攝,包括「型男混合體」Andrew、「187花美男」Carson、「可愛兜風耳」HoHo、「陽光男孩」Juzco、「嫰版王浩信」Louis、「Young版尊龍」Ray、「純愛莫少聰」Nelbon、「害羞台男」Kevin、「型男主廚」Kenny及「柔情版香取慎吾」Howard。
《仔仔一堂》逢周一至五晚10點半J2 (82) 台播映
登入後即可查看我的收藏
登入後即可查看瀏覽記錄