大S徐熙媛同汪小菲離婚一年,自從大S同具俊曄翻撻再婚之後,雙方一直就離婚後錢銀問題一直隔空大戰。而具俊曄亦被牽連,有內地網民指佢同大S早喺幾年前已經有來往,激到佢都激動喺社交平台澄清。
繼早前台灣主要電視台直播手起刀落凌遲一張傳說過千萬台幣,而實際只係約10萬台幣嘅愛的床褥之後,雙方一直你來我往各有攻守。不過到3號下晝,大S就突然爆Seed,指汪小菲喺2018年自己生日當日,借落2600萬台幣未還,而所謂嘅台灣物業亦係自己出錢買,更放狠話「難怪軟飯賣的駕輕就熟」,正式還擊唔留手。
不過喺北京嘅汪小菲一晚就連出幾Post,先係將大S豪花佢名下信用卡買衫嘅各個Item都一一列出,再指係離婚時大S要求為方便照顧小朋友生活而留低俾佢哋使用,甚至搬埋離婚協議出場,將當中細節完全曝光,例如每月要100萬台幣生活費,同埋小朋友教育費用,仲有負責物業嘅2.5億台幣按揭貸款。
(網上圖片)