輕．功｜大結局「天使的羽毛」助眾人尋獲繆妙超感動遺言

由黃偉聲監製，龍文康擔任編審嘅新劇《輕．功》，將會喺嚟緊嘅星期一(5號)正底推出。當中除咗有兩大好戲之人黎耀祥同龔慈恩坐鎮之外，佢哋劇中嘅子女蔣祖曼、朱敏瀚同樣有唔少火花。

Joman同朱仔喺《輕．功》當中扮演一對姊弟

扮演洪翊嵐嘅蔣祖曼除咗早年喺唔少電影演出之外，近年喺唔同劇集嘅演技都備受肯定，好似喺《鐵探》、《使徒行者》同《逆天奇案》嘅演出就廣獲好評，今次首度擔正成為女一，仲喺下月舉行嘅《萬千星輝頒獎典禮2022》獲提名「最佳女主角」，演出就令人非常期待喇。

蔣祖曼飾演嘅女強人洪翊嵐做事果斷能幹，但係同時係「控制狂」咩都要管住晒，雖然佢不時同老竇洪十一黎耀祥頂撞，但其實內心十分關心爸爸。與此同時，翊嵐亦要面對自己嘅感情問題，令佢只有寄情工作。長年責任如山嘅佢，點樣「放低枷鎖、放輕自我」，就係佢要面對嘅「輕功」。

Joman受訪時話：「咁多年嚟冇演過小品劇，終於可以試啲未做過嘅角色同戲種，同時我就變得好緊張，因為要變返新人學習新嘅嘢。今次角色內心變化會多啲，喺做人處事方面，現實中嘅我同角色係完全唔同，但對屋企人嘅態度，佢又有我嘅影子喎，其實每個人睇呢套劇，都可以喺唔同角色上搵到自己嘅影子，我覺得劇集slogan好好，『100個人，100種共鳴』。」佢又話好榮幸可以同視帝祥哥合作：「我成日趁佢拍攝時睇Mon偷師，好多場戲都睇到我哋眼濕濕，真係演得好好。」

至於細佬洪翊風朱敏瀚近年演技不斷進步，先後喺2020年同2021年分別奪得「飛躍進步男藝員」同「最佳男配角」獎，今年仲機會再下一城、因為朱仔憑《痞子殿下》獲提名「最佳男主角」。

朱仔飾演嘅洪翊風，性格簡單隨和但有欠上進心，點樣由小朋友變成「舉重若輕」嘅男子漢，就係佢需要學習嘅「輕功」喇。朱仔繼《拳王》後再同祥哥結父子緣，佢話：「好開心可以再同佢合作，上次佢個角色比較有權勢，同佢有一種距離感，今次就係一個正常家庭，關係 Close好多，感情戲同交流都多啲，有一排開工好似返咗屋企咁，拍得好輕鬆自在。」

至於同「家姐」Joman嘅相處，朱仔話：「大家年紀真係似姊弟，同埋現實我得兩個阿哥，其實有個家姐都幾好吖，家姐真係會特別錫細佬。」

而劇中扮演洪十一嘅一班舊同事兼街坊同樣值得注意，分別係前服裝師李世舫鄭子誠、前道具師方芯王綺琴、茶水姐姐姚寶螢寶珮如、前副導演鍾志威韋家雄同前編劇吳錦賢歐瑞偉，個個角色都性格鮮明，但係背後其實都有住沉重嘅過去。而值得一提嘅係，《輕．功》會延續同樣由黃偉聲監製、龍文康任編審嘅《牛下女高音》精神，劇中會重現唔少經典金曲翻唱版，好似《深愛着你》、《一生何求》、《現代愛情故事》、《飄》、《也許》等，絕對能勾起觀眾嘅集體回憶。