開心無敵獎門人丨東張女神瞓身「演出」 利穎怡拋開偶包High到除衫

當林雪遇上獎門人會有咩化學作用?咪就係令大家笑唔停囉!今晚播出嘅一集《開心無敵獎門人》,有林雪、彭健新、鄧兆尊、陳彥行、陳嘉桓同路芙嘅「獎門人好友」隊,對戰「東張女神」隊嘅利穎怡、王嘉慧、黎寬怡、梁菁琳同梁敏巧。
林雪完全係今集MVP林雪完全係今集MVP東張女神隊個個都玩得好投入。東張女神隊個個都玩得好投入。
第一個game「開心無敵燈燈燈」就擺明幫觀眾謀福利嘅,一眾東張女神分別擺出「IG 水着」、「三級片封面」同「老土影相」嘅pose,畀晒機會大家cap圖啦!雖然呢邊主打性感,但林雪呢啲見慣風浪嘅老江湖當然未驚過啦,以諧趣迎戰嘅佢,當要擺出「經典電影人」pose時,見佢伸出手指大家都以為係揸槍pose啦,點知雪哥解釋原來係扮「醉拳」,令大家笑唔停。
陳嘉桓同路芙呢個pose係????陳嘉桓同路芙呢個pose係????
而喺「開心無敵落大閘」時,一班靚女齊齊拋下女神包袱,玩得十分投入。「東張女神」隊嘅利穎怡仲High到爆真・除衫嚟扮跳脫衣舞,而黎寬怡就趴晒地扮海獅,之後佢兩個又合體扮做「隆胸」手術,睇到人紅都面晒。至於另一隊嘅女神陳嘉桓同樣玩得夠豪放,除咗蹲低扮踎廁同放屁外,又表演狂野揈水髮,相當盡慶呀。


全晚另一個爆笑位,就要數「開心無敵口噏噏」,林雪嘅口音令對手聽到成頭黑人問號,之後又將「柑蕉桔梨碌柚」講成「柑蕉桔梨蘿柚」,令到全場爆笑。齋講已經咁多爆笑內容,今晚嗰集你又點可以錯過呀!

《開心無敵獎門人》逢星期日 20:30 翡翠台

 相關推薦