中年好聲音丨再有三人以五燈入圍 梁德欣故事感動眾人

全新綜藝歌唱真人騷《中年好聲音》,4號晚播出號一集再有13人直接晉級 50 強,當中更加有3人奪得5盞燈滿分成績,分別係何博文、林鉫徫同支嚳儀。

現年 38 歲嘅林鉫徫係一位歌唱老師,佢坦言因為自己嘅中性打扮而受盡冷言冷語,當中不乏學生嘅家長們怪言論,林鉫徫話:「有啲家長要求老師一定要長頭髮同着裙, 咁佢先會畀小朋友跟呢個老師學,我自己有啲深深不忿,希望透過呢個節目為自己平反, 其實唱歌係一個興趣,無關外形同性別事!」結果成功以《命硬》俘虜一眾評審獲得五盞燈。

而36歲嘅自助烘焙店東主支嚳儀,一直希望加入娛樂圈,但因為被媽媽反對而擱置夢想,直到現時結咗婚生咗小朋友,仲創業做埋老闆之後,支媽媽就冇理由再反對,而比賽當日支媽媽仲有到場為支嚳儀打氣呀!以《假如》一曲嚟參賽嘅支嚳儀,最終獲得5燈爆分成績,評判伍仲衡說雖然覺得支嚳儀喺唱廣東歌方面仍要落吋功夫,但係佢依然畀5燈對方,原因係睇到對方嘅Potential係無限嘅。

而44歲嘅梁德欣,背後故事相當感人,身為全職媽媽嘅佢係一位紅斑狼瘡症患者,多年嚟隨時都要出入醫院,又因為病情而服用咗十年類固醇,今次比賽係得到家人全力支持,而參加比賽嘅原因,係想鼓勵長期病患嘅朋友、病友同埋一眾媽媽們,話界大家知大家都可以勇敢追夢。德欣以一首《小天使》送給媽媽,佢解釋因為梁媽媽為咗佢而專誠去學中醫,眼淺嘅肥媽亦鼓勵佢話:「呢個世界係好公平,點解個天會畀個病你?因為個天覺得你承受得到,或者係因為學你話齋,好少同佢(媽媽)講多謝你、好愛你,我哋成日覺得家人嘅愛係必然,但你可唔可以同佢講聲 I love you ,只要你得閒打畀媽媽講聲 I love you,咁就得架喇!」

《中年好聲音》 逢星期日 21:30 翡翠台

 相關推薦