中年好聲音丨林鉫偉曾遭惡言盼參賽證明自己 梁德欣患紅斑狼瘡症曾徘徊死亡邊緣

《中年好聲音》播到第二集繼續係50強之戰，高手過招展現唱功，呢次再有13位參加者晉級，何博文、林鉫偉及支嚳儀同獲五盞燈。

原來歌唱老師林鉫偉揀唱《命硬》同自身故事有關，林鉫偉追夢路上因中性外表遇過唔少冷言冷語，佢回憶喺追夢生涯聽到好多反對聲音：「因為我嘅外形同性別，令人有少少biases，我係一個歌唱老師，啱啱出嚟教班，有啲家長要求唱歌老師一定要長頭髮同著裙，佢先畀小朋友跟呢位老師學，我聽咗呢件事，我都有少少深深不忿，好多人覺得你咁嘅身形同外表都唔會紅，有時我啲朋友同屋企人都會講。」林鉫偉希望透過呢個節目為自己平反，一路唱《命硬》，佢想話畀大家知道只要堅持，冇嘢係唔得。

梁德欣身患紅斑狼瘡症曾徘徊死亡邊緣，呢次佢希望憑歌感謝生命中嘅小天使，梁德欣感謝愛女同家人支持抗病：「佢就會襲擊你身上任何一個器官，我嗰時差啲死，因為佢襲擊我嘅血，每次襲擊都唔一樣，好彩上次醫生救番我，之後要食10年類固醇，我以為捱過咗一關，原來嗰時先係噩夢嘅開始，有好多副作用，好辛苦先可以好似而家咁唱歌畀大家聽。」梁德欣多謝愛女不斷鼓勵佢去追夢。

46歲前商人陳敬賢獻唱呂方嘅《流浪花》，佢細說「高山低谷」嘅失敗經歷，最終一無所有，頓時流下男兒淚，車婉婉及肥媽被佢嘅故事而感動，全程拎紙巾不停拭淚，陳敬賢受訪時指本來唔想講起此事覺得好醜，肥媽則不斷鼓勵對方要放低過往嘅失敗，勇敢向前行。

另一參賽者柳冕以四燈晉級，盼望鼓勵傷殘人士重投社會，柳冕好開心獲得四盞燈：「我哋係做到，參加呢個比賽畀更多傷殘人士睇到殘都可以追夢，如果你有自己技能，你唔好收埋自己，你可以重投社會，好多傷殘人士係後天傷殘，佢哋都讀好多書、做好多嘢、識好多嘢，唔好嘥咗自己。」

支嚳儀雖然獲五盞燈，不過佢自評表現不佳，更送自家店嘅糕點派畀現場參加者，佢希望盡快適應緊張嘅感覺，等自己可以發揮到水準。