寵妻黎耀祥為圓老婆飛天夢 碌盡人情卡出動水車威吔組

寵妻黎耀祥為圓老婆飛天夢  碌盡人情卡出動水車威吔組

黎耀祥同龔慈恩喺台慶劇《輕・功》入面飾演一對夫婦,呢日佢哋同劇中大女Joman蔣祖曼、細仔朱敏瀚等去到南生圍拍攝一場古裝戲,唔好見到拍攝現場又水車又威吔,就以為一定係打鬥戲,其實呢場係一場浪漫寵妻戲呀!

祥仔解釋戲入面佢老婆一直有個心願,就係兩公婆一齊試下飛,所以劇中祥仔就碌盡人情卡,搵人準備晒威吔嗰啲畀佢兩個飛,但係問到祥仔同龔慈恩係咪真係要上威吔飛一轉?祥仔就話因為喺重要關頭大女嚟到出手阻止,所以令佢哋飛唔成呀。

Joman同朱仔喺劇中都不乏打鬥場面,但Joman就話因為細佬朱仔係做佢替身,所以體力上對方係比較辛苦,而朱仔就話打鬥動作戲還好,反而係要平衡心理比較難:「我哋明明拍緊一套時裝劇,但點解會咁多古裝、成日嚟南生圍、咁多吊威吔咁。」

而郭子豪同Iris林凱恩今次就喺劇中客串一場戲中戲,飾演武林高手嘅佢哋,又要吊威吔又要耍劍,為咗做好女俠嘅角色,Iris就搵咗教練做特訓呀!而郭子豪就話因為佢個角色造型有兩條觸鬚,所以拍前就特登睇下啲螞蟻係點嚟做角色參考呀!

逆天奇案2|金牌監製劉家豪率眾演員為榮休作宣傳 劉佩玥向觀眾拋線索破身份之謎

TVB新劇《逆天奇案2》即將喺下周一(1號)晚8點半首播,宣布7月榮休嘅金牌監製劉家豪率領陳展鵬、馮盈盈、黃智賢、蔣祖曼、張頴康及劉佩玥(Moon)等一眾演員現身商場進行宣傳。《逆天奇案》收視叫好叫座,所以將《逆天2》視為收山作嘅家豪哥好有壓力,仲話繼承上輯精神,扭盡六壬令觀眾追住睇。展鵬透露劇情將更加精彩,節奏仍然緊湊刺激。

家豪哥入行多年創作過唔少經典作品,即將要退下火線,當然會有不捨心情。所以家豪哥都話一家四口呢次會喺劇中出現以作紀念。家豪哥更喺結局埋下彩蛋,預告林夏薇嘅一句對白係自己向天下有情人講嘅一句話添!

至於講到退休生活,家豪哥就會同老婆梅小青展開郵輪旅行渡假,佢哋因唔捨得一對孫仔,所以佢哋決定分段式旅行,家豪哥亦期待日後弄孫為樂嘅生活。

阿Moon同張頴康呢對反派夫妻喺上一輯收穫唔少觀眾喜愛,雖然阿Moon角色已經死咗,但係佢呢次仍會參與演出。而阿Moon亦向觀眾大拋線索,叫大家用第一輯海報同第二輯做對比,喺眼神同服飾上可以搵到解謎答案。蔣祖曼同黃智賢雖然繼續做一對,但二人感情就遇到唔少危機,更有「最強第三者」出現!

《逆天奇案2》周一至五晚8點半翡翠台播出

 相關推薦

熱門搜尋