蘇師傅《開壇》教睇人緣好壞 劉華紅足幾十年因為呢條紋

嚟緊星期五晚喺 J2 播出嘅《開壇》，蘇師傅會以「人緣」作為主題。而港姐冠軍 黃嘉雯 同  Amber陳若思 就分別用IG關注人數做比較嚟測試喇。

節目10月拍攝時Carmaney嘅關注人數有87.9K，而Amber則有76.5K，Carmaney當時仲預計「Amber會超過我」。事隔個多月後，佢哋嘅IG關注人數(截至12月6號)，Amber嘅帳戶飆升到91.9K，激增逾1.5萬人、而Carmaney亦唔輸蝕增加近萬人去到97.6K。

Amber接受訪問時話人數暴增，要多得 J2 節目《港女野人》，佢話︰「《港女野人》好多人睇，節目完咗之後，我哋仲有一齊行青山，同埋去二澳， 真係好多人認得我哋打招呼。」而蘇師傅就指喺娛樂圈打滾，人緣好代表有觀眾緣，所以今集幾位J2ers都打醒十二分精神聽。

師傅話想知人緣好壞，可以由尾指、眉同眼着手，佢話︰「眉為交友宮、朋友宮。眉毛 貼眉骨，同朋友之間較容易和睦相處。眉毛粗又亂又豎，容易識到唔好嘅人。」而手指尾越短，就越易識到朋友。

節目又講到面相當中，可以睇出有邊類貴人扶持。分別係額頭主上司、長輩嘅幫助，兩顴主平輩、朋友等貴人，師傅就大讚Carmaney雙顴有肉包住稱為暗顴︰「有貴人容易揸大權。」師傅又話喺娛樂圈發展，面相有兩條紋好緊要，仲爆劉德華長期大紅嘅秘密，原來除咗個人努力之外，就因為呢兩條紋而大受歡迎︰「劉德華嗰兩條紋生得好靚好靚好靚。」 究竟係咩紋就要睇節目齊齊搵喇。