網絡世界之下唔少人早已習慣上網搵大神查資料，而搜尋排名亦成為各大公司嘅爭奪戰，Google星期三公佈2022年度嘅搜尋排名，當中除咗熱門話題、電影、仲有名人同活動嘅熱搜字眼。

年初因為第5波疫情令全港兵慌馬亂，「疫苗預約」同「強制檢測」就成為關鍵字頭兩位喇。而7月底發生嘅紅館表演意外，亦令「MIRROR演唱會」成為第7位，至於台慶劇《美麗戰場》就緊隨其後，排名第8。

至於電影方面，年中嘅《明日戰記》打破多項票房紀錄，可惜被後來居上嘅《正義迴廊》迎頭居上分佔1、2位，之後順序包括《Top Gun：Maverick》、《飯戲攻心》、《月老》、《奇異博士2：失控多元宇宙》、《智齒》、《阿媽有咗第二個》、《闔家辣》同埋《緣路山旮旯》。

而熱搜嘅娛樂名人當中，應屆香港小姐冠軍 林鈺洧 因為爆出為前藝人 林俊賢 嘅囡囡，令佢離開香港演藝圈後嘅發展吸引眾多人注意，成為呢一單項之首，之後嘅有無處不在嘅 張敬軒、早前展開紅館個唱嘅 林家謙、喺台灣出交通意外重傷嘅 林志穎、同富家子 鍾培生 搞出一堆是非嘅 袁嘉敏、女子組合 COLLAR等。緊接嘅係分手搞到成為全球追看官司嘅Johnny Depp 同 Amber Heard，最後一位則係喺奧斯卡衝上台一掌擊落自己名聲嘅Will Smith。

電影同名人之後，唔少得本地電視節目熱搜排名，最為關注10個排名當中，TVB製作同播出嘅就佔當中7個席位，而台慶劇《美麗戰場》就成為當中首位，之後係年中播出嘅《家族榮耀》、第3名係《金宵大廈2》。

第4位則係韓劇《社內相親》，緊接係動作劇集《鐵拳英雄》，然後係內地製作由TVB播放嘅《尚食》。另一部內地劇集《星漢燦爛》排名第7位，之後就有醫療劇《白色強人II》同埋啱啱播映完畢嘅《超能使者》，第10位則係韓國真人騷《單身即地獄》。

陳山聰 同 劉穎鏇 呢對《超能使者》CP，呢日再次合體為一個開幕活動擔任嘉賓，高勇同Open姐都一齊入圍星期日就舉行嘅《萬千星輝頒獎典禮》，呢日佢哋就話已經為當日嘅戰衣做足準備，到時一定會令大家眼前一亮，Tiffany仲率先爆話一對美腿到時會同大家見面喎。

山聰同Tiffany繼《超能》之後，近日又正合作新劇《奪命提示》，不過今次就係上司同下屬關係，佢哋仲話查案之餘又會有唔少打鬥戲，所以一樣係大挑戰，但係記對白一樣係一大考驗呀。