Google搜尋排行榜出爐 TVB佔足7位《美麗戰場》成Top 1

Google搜尋排行榜出爐 TVB佔足7位《美麗戰場》成Top 1

網絡世界之下唔少人早已習慣上網搵大神查資料,而搜尋排名亦成為各大公司嘅爭奪戰,Google星期三公佈2022年度嘅搜尋排名,當中除咗熱門話題、電影、仲有名人同活動嘅熱搜字眼。

年初因為第5波疫情令全港兵慌馬亂,「疫苗預約」同「強制檢測」就成為關鍵字頭兩位喇。而7月底發生嘅紅館表演意外,亦令「MIRROR演唱會」成為第7位,至於台慶劇《美麗戰場》就緊隨其後,排名第8。

至於電影方面,年中嘅《明日戰記》打破多項票房紀錄,可惜被後來居上嘅《正義迴廊》迎頭居上分佔1、2位,之後順序包括《Top Gun:Maverick》、《飯戲攻心》、《月老》、《奇異博士2:失控多元宇宙》、《智齒》、《阿媽有咗第二個》、《闔家辣》同埋《緣路山旮旯》。

而熱搜嘅娛樂名人當中,應屆香港小姐冠軍 林鈺洧 因為爆出為前藝人 林俊賢 嘅囡囡,令佢離開香港演藝圈後嘅發展吸引眾多人注意,成為呢一單項之首,之後嘅有無處不在嘅 張敬軒、早前展開紅館個唱嘅 林家謙、喺台灣出交通意外重傷嘅 林志穎、同富家子 鍾培生 搞出一堆是非嘅 袁嘉敏、女子組合 COLLAR等。緊接嘅係分手搞到成為全球追看官司嘅Johnny Depp 同 Amber Heard,最後一位則係喺奧斯卡衝上台一掌擊落自己名聲嘅Will Smith。

電影同名人之後,唔少得本地電視節目熱搜排名,最為關注10個排名當中,TVB製作同播出嘅就佔當中7個席位,而台慶劇《美麗戰場》就成為當中首位,之後係年中播出嘅《家族榮耀》、第3名係《金宵大廈2》。

第4位則係韓劇《社內相親》,緊接係動作劇集《鐵拳英雄》,然後係內地製作由TVB播放嘅《尚食》。另一部內地劇集《星漢燦爛》排名第7位,之後就有醫療劇《白色強人II》同埋啱啱播映完畢嘅《超能使者》,第10位則係韓國真人騷《單身即地獄》。

電影泉攻略丨《哥斯拉X金剛:新帝國》演員分享拍攝花絮 《功夫熊貓4》故事總監分享創作靈感

王鎮泉 Jeoffrey  每星期為你提供最熱辣電影資訊,中外猛片專訪花絮上映時間全部集齊。「電影泉攻略」每周四買定爆谷陪你睇新戲。 

新片《哥斯拉X金剛:新帝國》,哥斯拉同金剛呢個怪獸組合拍到第五集,佢哋唔再係死對頭,而係要聯手對抗未知嘅神秘強敵,泉叔亦同戲中演員Dan Stevens、Brian Tyree Henry、Rebecca Hall、Kaylee Hottle,以及導演Adam Wingard做咗專訪,分享拍攝呢套動作大片嘅幕後甘苦。 

本周新片有法國電影《分身走錯佬》,以及老少咸宜嘅新一集系列動畫《功夫熊貓4》,而本集嘅故事總監係土生土長嘅香港人Kelvin Tsang,除咗分享自己喺電影中負責嘅工作,仲同大家分享影響自己最深嘅港產片,佢透露自己受香港電影影響好深,所以對動作設計好有興趣,今次亦擺咗好多相關元素入電影中,希望大家會鍾意。 

過去一星期嘅票房龍虎榜方面,內地女星賈玲自導自演嘅《熱辣滾燙》,票房好似片名咁熱辣,而第二位係由兩代捉鬼敢死隊合力炮製嘅《捉鬼敢死隊:冰封魅來》,而票房冠軍就繼續係《沙丘瀚戰:第二章》。

 相關推薦

熱門搜尋