蕭正楠新歌《小小大人物》獻給亡父 三子唱貼地洗腦歌《HEA到爆》反映市民心態

音樂人伍仲衡將於2023年1月6號聯同蕭正楠同區永權假灣仔伊利沙伯體育館舉行《HEA TOGETHER LIVE 2023》音樂會，「HEA」係指Harry(伍仲衡)、Edwin(蕭正楠)同Albert(區永權)，伍仲衡為咗呢次音樂會創作一首三人合唱歌《HEA到爆》，同時亦為蕭正楠創作新歌《小小大人物》。

對於三子新合唱歌《HEA到爆》，蕭正楠笑言追歌追咗好耐，伍仲衡解釋：「最辛苦就係填個一份歌詞，音樂我ok，但詞我真係諗到頭都爆。」蕭正楠同區永權大讚歌詞非常好，夠晒貼地，反映到7百萬市民心態「想HEA」，伍仲衡又指HEA並唔係負面，首歌係叫人唔好只顧住工作，要享受生活，識享受生活就一世無憂愁。

HEA爆三子笑言身體力行，日前錄歌「HEA」、一路睇世界盃、一路輪流入Studio，佢哋表示錄歌過程十分快速順利，只用咗兩個鐘頭錄起新歌，伍仲衡仲爆：「我都話錄這首歌好快搞掂，我試過（有歌手）錄40幾個鐘，不過我就唔講邊個。」

三子受訪期間更即場展現歌喉，唱出新歌《HEA到爆》嘅洗腦歌詞，絕對令人十分期待， 伍仲衡更為蕭正楠作曲填詞獨唱新歌《小小大人物》，蕭正楠直言感激伍仲衡為自己作新歌以紀念天上嘅父親，「首歌我要獻上給我天上的爸爸。我的事業、婚後生活都變好，但無辦法同爸爸分享，希望用這首歌去多謝我爸爸」。

音樂會1月6號舉行，門票銷售情況非常理想，伍仲衡直言：「一個字，已經爆咗啦！你老婆（蕭正楠太太黃翠如）買晒！」蕭正楠指太太黃翠如係必殺技：「佢真係搵咗好多人買。」連區永權都大讚黃翠如好嘢，佢哋唔使開口，身邊人都用自己嘅人際網絡，包括蕭正楠老婆，叫啲朋友出來吃飯，順便叫人哋問買飛，讓佢哋感覺好窩心，蕭正楠更笑問區永權：「會唔會係你個仔都係咁，兇佢啲同學仔？」區永權笑言：「應該買到（同學仔）冇晒錢！」