張敬軒為免中招影響個唱 閉關謝絕餐飲聚會

張敬軒呢日現身品牌活動，展現一系列由佢設計嘅手機殼，靈感係來自佢嘅兩首作品，希望藉著即將舉行嘅演唱會，吸引大家聽佢嘅滄海遺珠，呢兩個禮拜忙住搞演唱會特效同音響效果，軒仔為免中招影響個唱，佢已準備「閉關」謝絕一切聚會。

軒仔聖誕及跨年演唱會開騷在即，雖然防疫已放寬，但係軒仔為咗安全起見，佢不敢鬆懈，軒仔表示大時大節好多朋友約食飯、舉行party，軒仔為咗自己防疫安全，減少去餐廳用膳，多啲留喺屋企煮嘢食。

軒仔日前為音樂人Johnny Yim做伴郎兼客串大妗姐，令軒仔學到唔少傳統習慣，佢有意展開婚禮策劃工作，學好晒所有大妗姐嘅工作流程，佢感覺似做騷要搞氣氛，仲要即場播歌，佢笑言要包起圈中喜事做婚禮策劃。