謝安琪分享張繼聰昔日甜蜜宣言 不介意未來夫妻檔演出

張繼聰與袁澧林（Angela）呢日出席電影《窄路微塵》首映禮，呢套戲之前喺金馬獎已獲得好成績，佢哋更雙雙入圍角逐金馬影帝影后，張繼聰期望挑戰不同角色。

袁澧林對於拎金像獎抱平常心，張繼聰解釋諗呢啲整個人就緊張得囉囉攣，若果有機會獲提名當然係好大嘅榮譽，張繼聰笑指自己仲係年青演員：「不問結果，默默耕耘應該係咁。」張繼聰表示仍會keep住演喜劇，亦唔想角色不太重複，希望等好劇本發揮到該角色。

袁澧林今次喺戲中演單親媽媽，事前佢同小演員相處，抽幾日時間同小朋友出街玩，揣摩做媽咪嘅心態，同照顧小朋友嘅細節。

阿聰老婆謝安琪呢日有現身支持，佢喜歡老公演嘅每一個角色，大讚老公每次都為角色服務，見阿聰每次都先跟演出對手有好好嘅溝通，從中向老公學習，謝安琪又指呢幾年觀察老公拍電影，令佢都覺得拍戲好有趣，趁機向老公偷師，謝安琪唔介意一齊演戲：「兩個一齊演就睇劇本，因為好多時兩公婆一齊演戲係難，大家對你哋太多刻板印象，好難將二人化喺角色裡面，比較難度高，遇到啱嘅角色都可以試吓。」

阿聰則指若果要兩公婆開音樂騷就要睇老婆諗法，謝安琪感謝老公喺事業上嘅尊重，同時分享跟老公昔日甜蜜宣言，謝安琪回想：「好耐之前我哋啱啱出道，佢話將來有機會我好想贊助你嘅演唱會，佢話有一次演唱會係我張繼聰冠名贊助就好，當然冇發生過，但係我又好多謝佢喺我事業上好尊重同支持。