由黎耀祥、龔慈恩、蔣祖曼及朱敏瀚等主演《輕.功》,噚晚講黎耀祥同蔣祖曼(Joman)「父女」大鬥演技,劇情講到翊嵐(蔣祖曼飾)赫然發現眾人偷偷籌備媽咪繆妙(龔慈恩飾)嘅回顧展。
由於有感展覽太過寒酸,翊嵐命令眾人「煞停」兼忍唔住連番數落,十一(黎耀祥飾)見狀即扯火鬧爆:「大家為咗呢件事花咗幾多心機,你講嘢使唔使咁刻薄?有冇當過大家係長輩!」之後父女因價值觀問題起爭執,事緣十一認為翊嵐唔應該因「移民問題」與拍拖多年嘅男友Duncan(李日朗飾)分手,翊嵐身為女強人卻唔想因愛情放棄事業:「我唔係媽咪呀,做唔到嫁雞隨雞。」十一聞言再扯火:「咩呢種人嗰種人呀,佢生你㗎。」翊嵐再還擊:「年代唔同咗,我有我生活,我有我事業,我唔一定要嫁人做少奶奶,我可以揀。」
雖然兩父女「前世撈亂骨頭」咁款,由於翊嵐始終係孝順女,明白爸爸與父母好友苦心,故後來利用自己人脈及網絡為媽咪舉辦回顧展,亦為十一及眾好友重燃希望。
祥哥與Joman連場罵戰,二人演繹均十分精彩,背後意義發人深省,反映兩代人因價值觀落差衍生嘅矛盾,十一與嵐嵐各自以為係為對方好,其實忽略咗對方真正感受同處境,值得反思兩代人嘅分歧,其實都係出於愛;提到劇中不時要對祥哥破口大罵,Joman直言好大壓力:「好記得開廠頭幾日就要指住祥哥嚟鬧,加上我第一次接觸小品劇已經好緊張,係咁諗點樣可以演好啲戲,點知諗得越多就越鑽牛角尖。喺我好困擾時,龔姐同祥哥好好咁同我講『唔使諗咁多,咁演就啱喇』,好感恩佢哋好願意同我分享。」
呢集另一亮點就係十一為繆妙嘅回顧展錄生平旁白,依然思念著愛妻之情,錄旁白前表現緊張,為咗幫亡妻成就美事,十一最終強忍傷痛,以不疾不徐嘅溫柔語速讀出亡妻生平,提及愛妻嘅烏龍事及威水史時,先係露出甜笑同驕傲表情,笑容背後盡是痛惜,平淡語調背後盡見真摯嘅愛,最後十一眼濕濕笑住講:「佢係影迷心中嘅蓋世女俠、丈夫嘅烏龍嬌妻、子女嘅傻瓜媽咪,千姿百態,此生無憾。」畫面同對白均十分催淚。
唔少網民睇完呢場戲後大呼感動,更有人將相關場口媲美影后鮑起靜早前於《下流上車族》中嘅錄訊息獨腳戲經典場口,而朱仔講到能夠近距離睇祥哥神級演技,受訪時大讚祥哥好厲害:「一聽佢錄音就開始嚟料(想喊),演呢套劇特別之處,係啲感情唔可以去得太盡,要點到即止。所以我喺現場就咁做咗一個抹眼淚嘅動作,唔容許自己喊得太勁,反而咁樣個感覺更加乸住乸住!」
《輕.功》逢周一至五晚九點半翡翠台播映