輕.功丨蔣祖曼喪鬧祥哥反映兩代矛盾 黎耀祥深情錄音晒視帝級演技

輕.功丨蔣祖曼喪鬧祥哥反映兩代矛盾 黎耀祥深情錄音晒視帝級演技

由黎耀祥、龔慈恩、蔣祖曼及朱敏瀚等主演《輕.功》,噚晚講黎耀祥同蔣祖曼(Joman)「父女」大鬥演技,劇情講到翊嵐(蔣祖曼飾)赫然發現眾人偷偷籌備媽咪繆妙(龔慈恩飾)嘅回顧展。


翊嵐赫然發現眾人偷偷籌備媽咪繆妙嘅回顧展。
由於有感展覽太過寒酸,翊嵐命令眾人「煞停」兼忍唔住連番數落,十一(黎耀祥飾)見狀即扯火鬧爆:「大家為咗呢件事花咗幾多心機,你講嘢使唔使咁刻薄?有冇當過大家係長輩!」之後父女因價值觀問題起爭執,事緣十一認為翊嵐唔應該因「移民問題」與拍拖多年嘅男友Duncan(李日朗飾)分手,翊嵐身為女強人卻唔想因愛情放棄事業:「我唔係媽咪呀,做唔到嫁雞隨雞。」十一聞言再扯火:「咩呢種人嗰種人呀,佢生你㗎。」翊嵐再還擊:「年代唔同咗,我有我生活,我有我事業,我唔一定要嫁人做少奶奶,我可以揀。」


翊嵐霸氣外露踩上回顧展,仲要左彈右彈。十一扯火鬧女唔識尊重人,戲味十足。
雖然兩父女「前世撈亂骨頭」咁款,由於翊嵐始終係孝順女,明白爸爸與父母好友苦心,故後來利用自己人脈及網絡為媽咪舉辦回顧展,亦為十一及眾好友重燃希望。


一波未平一波又起,十一發現阿女瞞住自己分咗手。十一亦認為阿女唔應該為咗移民咁小事就分手。
祥哥與Joman連場罵戰,二人演繹均十分精彩,背後意義發人深省,反映兩代人因價值觀落差衍生嘅矛盾,十一與嵐嵐各自以為係為對方好,其實忽略咗對方真正感受同處境,值得反思兩代人嘅分歧,其實都係出於愛;提到劇中不時要對祥哥破口大罵,Joman直言好大壓力:「好記得開廠頭幾日就要指住祥哥嚟鬧,加上我第一次接觸小品劇已經好緊張,係咁諗點樣可以演好啲戲,點知諗得越多就越鑽牛角尖。喺我好困擾時,龔姐同祥哥好好咁同我講『唔使諗咁多,咁演就啱喇』,好感恩佢哋好願意同我分享。」


祥哥呢場戲大晒視帝級演技,冇激動嚎哭。
呢集另一亮點就係十一為繆妙嘅回顧展錄生平旁白,依然思念著愛妻之情,錄旁白前表現緊張,為咗幫亡妻成就美事,十一最終強忍傷痛,以不疾不徐嘅溫柔語速讀出亡妻生平,提及愛妻嘅烏龍事及威水史時,先係露出甜笑同驕傲表情,笑容背後盡是痛惜,平淡語調背後盡見真摯嘅愛,最後十一眼濕濕笑住講:「佢係影迷心中嘅蓋世女俠、丈夫嘅烏龍嬌妻、子女嘅傻瓜媽咪,千姿百態,此生無憾。」畫面同對白均十分催淚。


經歷喪妻傷感,十一細說對愛妻嘅感覺。
唔少網民睇完呢場戲後大呼感動,更有人將相關場口媲美影后鮑起靜早前於《下流上車族》中嘅錄訊息獨腳戲經典場口,而朱仔講到能夠近距離睇祥哥神級演技,受訪時大讚祥哥好厲害:「一聽佢錄音就開始嚟料(想喊),演呢套劇特別之處,係啲感情唔可以去得太盡,要點到即止。所以我喺現場就咁做咗一個抹眼淚嘅動作,唔容許自己喊得太勁,反而咁樣個感覺更加乸住乸住!」


朱仔嘅喊戲都係點到即止,佢話忍住喊嗰吓反而更加乸住乸住。
《輕.功》逢周一至五晚九點半翡翠台播映

逆天奇案2|金牌監製劉家豪率眾演員為榮休作宣傳 劉佩玥向觀眾拋線索破身份之謎

逆天奇案2|金牌監製劉家豪率眾演員為榮休作宣傳 劉佩玥向觀眾拋線索破身份之謎

TVB新劇《逆天奇案2》即將喺下周一(1號)晚8點半首播,宣布7月榮休嘅金牌監製劉家豪率領陳展鵬、馮盈盈、黃智賢、蔣祖曼、張頴康及劉佩玥(Moon)等一眾演員現身商場進行宣傳。《逆天奇案》收視叫好叫座,所以將《逆天2》視為收山作嘅家豪哥好有壓力,仲話繼承上輯精神,扭盡六壬令觀眾追住睇。展鵬透露劇情將更加精彩,節奏仍然緊湊刺激。

家豪哥入行多年創作過唔少經典作品,即將要退下火線,當然會有不捨心情。所以家豪哥都話一家四口呢次會喺劇中出現以作紀念。家豪哥更喺結局埋下彩蛋,預告林夏薇嘅一句對白係自己向天下有情人講嘅一句話添!

至於講到退休生活,家豪哥就會同老婆梅小青展開郵輪旅行渡假,佢哋因唔捨得一對孫仔,所以佢哋決定分段式旅行,家豪哥亦期待日後弄孫為樂嘅生活。

阿Moon同張頴康呢對反派夫妻喺上一輯收穫唔少觀眾喜愛,雖然阿Moon角色已經死咗,但係佢呢次仍會參與演出。而阿Moon亦向觀眾大拋線索,叫大家用第一輯海報同第二輯做對比,喺眼神同服飾上可以搵到解謎答案。蔣祖曼同黃智賢雖然繼續做一對,但二人感情就遇到唔少危機,更有「最強第三者」出現!

《逆天奇案2》周一至五晚8點半翡翠台播出

熱門搜尋