群星現身粵劇首演 葉童願拍劇陳美齡將抱孫

群星現身粵劇首演 葉童願拍劇陳美齡將抱孫

粵劇《呂布情傾貂蟬》呢日舉行首演,一班圈中人齊齊到場欣賞,其中 黎燕珊 原來仲自細已經跟父母睇唔少粵劇,入行之後仲喺劇集扮演過文武生。最近啱啱忙完新劇《本尊就位》拍攝嘅佢,又話喺下一部劇集開始之前好好休息充電,仲要抽時間好好整理新居咁話。

葉童 自客串《香港愛情故事》就未有參與新劇演出,呢日現身首演現場,佢就話如果有合適劇本的話,隨時都會再次現身電視螢幕同大家見面呀。

而 陳美齡 呢日就話自己好快就會正式抱孫,仲話正計劃飛去美國等BB出世,順便照顧同幫忙新抱,但係又擔心太介入佢哋嘅生活,又話要做一個好嫲嫲咁話呀。

錢小豪 呢日就話因為嘉樂太忙已經一段時間冇見面,不過就已經約好一家人食飯,當係提早團聚過冬至咁話呀。

彭美施新編粵劇創新境界 多位名人捧場激讚精彩

由彭美施(施姐)擔任出品人暨總策劃嘅一連六場新編粵劇《白蛇‧許仙情越千年》日前隆重開鑼。呢次施姐一手策劃新編粵劇,無論內容、布景、視覺效果、唱做唸打、武場、服裝都盡見斥資製作,更破天荒起用三對文武生與花旦飾演許仙與白娘娘,每對組合演出兩場,而首演(26號)就有文武生李秋元與花旦梁燕飛打頭陣。

新編粵劇《白蛇‧許仙情越千年》近日開鑼
 
喺首場演出中,演員武功打得亮麗,尤其「人體詮釋」科技,令觀眾睇到台上嘅白娘娘由人身變白蛇,又如《盗仙草》一幕梁燕飛武藝超卓,加上飾演青蛇嘅曉瑜武出色,以及一班武師喺《水漫金山》精彩連場對打招式俐落,觀眾一直拍手叫好。

班主施姐帶領一眾演員於台上感謝觀眾支持
 
而特邀演出嘅宋洪波飾演韋馱,出場非常威武,聯同為今次特別剃頭演法海嘅符樹旺,都令觀眾印象深刻。除咗武打之外,白娘娘同許仙《斷橋》一段情深剖白,唱出哀怨情深,令觀眾對許仙改觀,而最後一幕《情越千年》,最令觀眾意想不到係結局喺保留傳統之下,再增添無窮突破創意,令觀眾拍爛手掌,大叫好睇!而專程捧場嘅沙姐林建明、賈思樂、廖安麗、錢小豪、馬寶顓等大讚施姐作品令佢地重新定義粵劇絕冇悶場,只有耳目一新嘅精彩。
 
一眾台前幕後謝幕時施姐在台上表示 : 「因為係首場演出,仲有好多可以改善地方,希望往後五場演出可以做到精益求精 ! 」同時亦多謝台前幕後百分百投入,先可以達到超水準演出。

 相關推薦

熱門搜尋