/public/article/images/202212/b910144e-6fb8-41b3-8c3a-8c192b98f105.jpg)
TVB綜藝歌唱真人騷《中年好聲音》為一眾人到中年，又唱得嘅男女提供千載難逢演出平台，鼓勵向夢想再出發，節目逢周日晚九點半喺翡翠台播映，由車婉婉擔任主持，評審團則為 Maria Cordero（肥媽）、張佳添、伍仲衡、林志美、周國豐。
噚（11 日）晚播出嗰集，第一部曲《勇氣！踏上夢想舞台》最後回合，是集再有8位直接晉級50強，當中有2位奪得5盞燈爆分成績，分別係吳大強同丁文俊，總結3集賽果，奪得5盞燈嘅參賽者共有8位，4盞燈則有24位，50強剩餘18個名額，則由評審從獲得3盞燈嘅參賽者中選出，下集開始將進行第二部曲《挑戰！兩個只能活一個》！
呢集最大睇頭就係分別有「過氣」及「現任」夫妻同場比賽，呂卓欣與許兆銘多年前因音樂走在一起，之後閃婚並生咗兩個小朋友，惟後來因為性格不合分開，自此冇再聯絡，如今二人竟喺追夢舞台再次相遇，事前亦唔知道對方會參賽。
40歲卓欣憑獻唱《傾城》奪得3盞燈，須進入等候區，卓欣分享時透露離婚後獨力湊大兩名女兒，坦言生活上遇到唔少壓力：「疫情期間，大家都好辛苦，差啲有抑鬱症，之後做咗直播主，並用音樂治療自己。」卓欣唱畢後緊接出場就係佢前夫許兆銘，獻唱《K歌之王》期間，卓欣更站在台邊，邊聽邊哭，惟許兆銘表現麻麻無緣晉級。
另邊廂鄺凱剛與陳嘉璐呢對現任夫妻表現恩愛，兩人20年前因參加比賽相識，如今20年後再度攜手參加《中年好聲音》，可謂別具意義，陳嘉璐直言老公係其Soulmate，甜度爆錶，可惜兩人未能一同晉級50強，陳嘉璐獲得4盞燈直接晉級，鄺凱剛則無緣晉級，但開朗豁達嘅鄺凱剛全程甜笑望住太太作賽，每分每秒均流露愛妻之情。
肥媽被兩人真摯愛情所感動，更因憶起亡夫淚崩，肥媽說：「我同我老公都係咁，佢打鼓我唱歌。」肥媽事後接受製作組訪問時坦言：「見到佢同老婆好Sweet，勾起我同老公嘅回憶，日日夜夜傾音樂、傾其他嘢，已經可以傾天光，同佢兩公婆好似，噚日（錄影當日）就係我老公兩周年死忌，《中年好聲音》好多嘢令我好投入到。」
詹偉業自稱係跳唱歌手，背後故事充滿洋蔥，詹偉業喺台上大晒狂野舞姿跳唱郭富城嘅《狂野之城》，最終獲得4盞燈。
48歲詹偉業透露選擇跳唱《狂野之城》係想獻畀因紅斑狼瘡症而病逝嘅太太，並透露苦練城城嘅歌長達廿多年，詹偉業續道：「太太廿幾歲就走咗，佢遺留落嚟嘅錄音帶裏面有郭富城嘅歌，第一首就係《狂野之城》，之後我就開始聽城城嘅歌。（有冇掛住佢？）仲好掛住太太。」之後詹偉業淚崩：「覺得好對佢唔住，年輕時對佢唔係咁好……當我想返轉頭嗰時，佢已經有咗呢個病……」
《中年好聲音》逢周日晚九點半翡翠台播映
