《法證V》一連兩集「劇本殺」個案,由一眾好戲之人大鬥法。保險公司經紀組長「大象」 楊證樺 ,同分區經理「老虎」何啟南 仲有兩位女經紀 「小兔」 趙璧渝 同「狐狸」 羅雪妍 份屬友好,兩年前佢哋齊齊被人事經理 于淼 精神虐待,楊證樺盛怒之下殺死女方,之後嫌犯胡定軒 杜大偉 同另一員工 曾健明 相繼死亡。
而IT部員工「山豬」 林子超 將事件寫成「劇本殺」,成功吸引一班當事人參與;隨住線索逐一被拆解,楊遭踢爆係殺人真兇,期間仲發狂欲大開殺戒,但係被飾演山羊嘅退休警察 李成昌 殺死。當大家正以為事件告一段落時,Dr. Fan 蔡潔 同余Sir 黃宗澤 就指出三名死者並非被同一人殺死。
由於兩晚劇情都同劇本殺「同步進行」,唔少觀眾都直指夠晒懸疑,仲話李成昌嘅出現同問 蔡思貝 借電話「相當有嫌疑」。
昌哥自早前喺《異搜店》演出大獲好評後,之後嘅《回歸》、《凶宅清潔師》同《美麗戰場》嘅演出都好評不絕。今次昌哥喺《法證V》再度展現好演技,13號晚最後一幕痛哭戲,仲獲觀眾認為係繼《異搜店》天台懺悔戲後再度演技爆發。
劇情中當昌哥聽到井Sir讚自己係好警察之後,緊接嘅近分半鐘獨腳戲中,重複講咗至少四次「我係一個好警察?」,情緒由乾笑自嘲演變至自責嚎哭,喺同一句對白做出咁大情緒轉折有一定難度。
昌哥亦認為今年係自己嘅「大大大豐收年」:「有公司認可,三套都有提名,我已經好開心。問我有冇信心攞獎呢?好老實,我冇信心,依家啲後生仔女好犀利,佢哋嗰種奮鬥、學習精神同演技,我真係唔夠佢哋嚟。」
而喺《全城一叮》奪冠嘅林子超演出IT宅男亦入型入格,原來Andy事前為角色做咗唔少功夫:「我一接到角色就上網搵IT宅男嘅Reference,因為覺得自己外形同個角色有啲距離,所以買咗副眼鏡,同埋事前戴咗幾日眼鏡去幫助投入個角色。」
至於趙璧渝同羅雪妍嘅動物造型亦獲觀眾大讚造型可愛又靚女。趙璧渝2013年已開始參與劇集拍攝,第26期藝訓班畢業後加入TVB之後,已參演超過80部劇集,兩年前憑《法證IV》嘅袒胸危站天台戲份贏得觀眾關注。羅雪妍則係《2020香港小姐競選》12強佳麗,舊年先開始參與劇集拍攝嘅佢,仲獲讚面孔清新亮麗。