陳國麟想娶有錢太太 黃嘉雯唔排除會秘婚

陳國麟想娶有錢太太 黃嘉雯唔排除會秘婚

應該大部份女仔都對結婚都有憧憬，所以當蘇民峰喺16號播出嘅《開壇》入面，講「婚姻」呢個主題嗰陣，三位女主持 Carmen倪嘉雯 、 Amber陳若思 、 Carmaney黃嘉雯 都勁留心聽，而男主持 Doniven陳國麟 就好關心自己娶唔娶到有錢老婆。

對於Doniven所關心嘅事，蘇師傅話男人眉粗夠濃又整齊，雙眼要黑白分明得來，要無神兼且鼻樑高同直，就係易靠到老婆，或者有異性資助，蘇師傅仲話Doniven個長相睇落都合資格，令佢相當興奮。事後Doniven就講返，完來蘇師傅曾經贈佢兩句話佢將來個太太會有錢，所以佢會問多兩句，Doniven又話即使另一半有錢都可以互相尊重，強調有錢女仔吸引佢之處，係因為佢叻，所以想了解下對方嘅世界係點。

Amber喺節目入面講到成日會幻想男朋友求婚嗰陣，會有999支玫瑰，佢話因為自己係個愛浪漫、著重儀式感嘅人，所以情人節同過時過節，即使冇禮物都一定要有花，佢解釋話：「因為我都會整蛋糕畀心儀嘅人，所以我都想人哋送花。」雖然對未來老公充滿幻想，但Amber話蘇師傅同佢講過「話有得嫁就嫁，唔好理個對象好唔好」，仲話對象好壞係整定嘅。

而Carmaney就被蘇師傅指有機會嫁入豪門或者嫁叻人，仲可以享夫福，不過事後Carmaney 接受訪問嗰陣，就苦笑話：「首先你要有個男朋友先，我而家冇，目前都係做好自己工作先。」Carmaney透露未來婚禮希望一切從簡，唔需要鋪天蓋地，更有機會秘婚、或者閃婚。

《開壇》82台 J2 逢星期五 23:00 播出