法證先鋒V｜陳嘉慧出拳兇狠獲封女拳王陳曉華一人分飾兩角靠造型入戲

TVB 55 周年台慶劇《法證先鋒 V》開播後，劇中女主角顏值一直係網民話題，除咗擔正嘅蔡潔、蔡思貝同王敏奕，單元個案演出女藝人亦備受關注。繼早前出場嘅陳曉華、羅毓儀及糖妹等，噚晚輪到憑《愛上我的衰神》人氣急升兼入圍「最受歡迎電視女角色」十強嘅陳嘉慧（Erica）。

唔少網民好好奇神秘人嘅真身。 Erica唧都唔笑，相信大家都好少見，但網民似乎好受落。

劇中飾演社工雁菊嘅Erica，與兒時好友傅劍成（丁子朗飾）合作，殺死社團人士張子雄（何偉業飾）。玄妙嘅係雁菊、劍成同一個神秘人聯手，鏡頭卻一直刻意隱瞞該名神秘人犯案時嘅身份樣貌，令劇情加添懸疑。

Erica喺呢套劇入面都係表情多多。 Erica角色原本係一個善良熱血嘅社工，慢慢變偏激兼走上歪路。
是次Erica演出有一定新鮮感，皆因Erica以「陽光少女」Style見稱，今次要180度轉變，飾演偏激熱血社工，喺劇中擅長打拳更係疾惡如仇，相當兇狠，喺其中一條花絮宣傳片中，Erica拍攝打架場面「起飛腳就起飛腳」，對住武師亦係拳拳到肉，獲封女拳王。

Erica事後受訪時笑言拍攝時其實一再被嫌唔夠力。 Erica兇狠同大展身手嘅一面，係咪好難得一見呢？ Erica事後受訪時笑言拍攝時其實一再被嫌唔夠力：「我每一下都係用盡吃奶嘅力去打佢哋，但佢哋依然話唔痛，係咁叫我畀啲力，我驚我會打死佢呀，其實我真係畀咗好多力，但佢哋依然叫我畀力。」
Erica即撒嬌澄清自己唔係兇狠：「好多謝武指教我點起腳同出拳，我睇片都覺得自己幾狼死吓！平時嘅我唔係咁，我平時好溫柔、好陽光！」Erica為咗劇中打拳場口，更專誠學打拳，而其拳手造型亦贏得網民正評，據知Erica劇中角色甚有發揮，稍後更涉及重大事件，期待值頗高。

佢嘅兇狠程度，嚇窒咗同場嘅洪永城（左）同丁子朗。
至於一人分飾母親柳青及女兒楊冰嘅陳曉華，亦係本周焦點人物，身為咖啡店老闆娘嘅楊冰本周將離奇失蹤，前法證員工司徒亮（白彪飾）及寶英（王敏奕飾）聯手展開調查，事件進展相當耐人尋味。