梁詠琪明年2月舉辦一連兩場演唱會，相隔5年再次登上紅館舞台，呢日接受訪問時，宣佈將加開一場，梁詠琪好期望今次演出：「而家見到個樂壇多咗騷，百花齊放，好戥歌迷同歌手開心，因為疫情大家對開騷有好大憂慮，主辦方願意開多一場，我都放心。」

梁詠琪坦言又想唱新歌同舊歌，佢知歌迷好想聽舊歌，不過梁詠琪有啲新歌又未喺演唱會唱過，佢希望三場個唱啲歌單唔同，最緊要歌迷開心聽到想聽嘅歌。

梁詠琪最近為個唱努力練歌，買咗兩支咪跟女兒喺屋企齊齊唱歌，不過梁詠琪冇心諗住與阿女同台演出：「主要係唔好畀壓力我，兼顧一個演唱會唔容易，仲要兼顧阿女嘅演出，真係會頭痛，佢喺台下做歌迷就夠。」

早前梁詠琪喺內地拍節目，好友許茹芸被邀請擔任嘉賓，佢好開心跟老友再聚：「本身一年見幾次，隨時話見就嚟，呢幾年冇發生過，突然有機會遇上當然要跑住撲埋去，我哋好珍惜大家嘅友情，幾年冇見雖然而家通訊發達，到面對面真係攬住，現時會覺得好珍貴。」

梁詠琪即將喺內地九個城市舉行巡演，呢日現身廣州個唱記招，因疫情關係，佢好耐冇返內地開騷，fans見到偶像相當興奮，窩心準備禮物祝賀。

梁詠琪得知有歌迷由1997年《短髮》開始一直支持自己，令佢覺得好感動，特別珍惜與歌迷們見面嘅緣份；梁詠琪透露屆時再次挑戰自彈自唱，亦會精心挑選歌單畀歌迷，梁詠琪預告愛女Sofia將有另類演出，阿女首次去錄音室唱歌，心情有啲緊張！