J2綜藝真人騷節目《仔仔一堂》成為城中熱話，史上首個男男配對真人騷，題材破格新鮮又感人，監製及主持王賢誌帶同「仔仔」Juzco、Carson、Louis及Ray，日前作客TVB娛樂新聞台節目《StarTalk》，接受主播許文軒訪問。

王賢誌入行多年，有感之前做過好多訪談節目要碌人情卡，而佢諗自己嘅同志身份可能大家有興趣了解更多，佢希望製作配對節目從而宣揚及分享同志正面訊息，Ray直言喺節目正式承認出櫃，Louis則想拎到父母嘅綠燈：「我大學嗰陣已經同阿媽講咗，但我阿爸知啲唔知一啲，我都好大膽相信佢(王賢誌)。」另一參加者Carson本身有做幕前，本身佢擔心影響工作選擇，考慮幾日先決定參與；Juzco曾經做演員，後來轉咗做KOL，因為拍呢個節目令佢走出情緒病陰霾。

王賢誌坦言試搵過2百人問對方有冇興趣參與：「畀人婉拒，咁我都有婉拒人，有啲想參加，我又覺得佢哋唔係好適合，參加呢個節目一定係單身同Gay，我唔想造假，外形同身形亦係考慮條件，佢一定係屋企人同工作環境都容許，呢啲冇得逼，有一個人想參加，不過佢因工作要請示美國總部，但係我已經等唔切，我有10個拍咗，佢話冇得拍攝好慘，佢公司啲人知道晒，佢想之後參加。」王賢誌叫大家留意節目有新仔仔參加。

Ray分享拍第一集面對鏡頭有啲尷尬，一來未試過Speed Dating，二來未試過一大班同志朋友食飯，王賢誌解釋有啲人係可能認識對方，但佢哋絕對唔係好熟嘅朋友，開拍前一直冇透露參加者身份，Louis更自爆本身識Juzco，但唔知Juzco有參加，Louis第一集見到Juzco即嘴藐藐。

王賢誌同Louis喺玩小遊戲時透露望對象第一眼係睇對方眼神：「睇到有冇feel、過唔過電，或者佢係咪(同性戀)。」Juzco則特別鍾情屁股大、粗小腿嘅男士：「我唔鍾意啲太瘦，鍾意啲眉粗。」講到最吸引對象之處，Louis笑談被封翻版王浩信，擁有奇怪氣場讓人覺得佢得意又大方，Louis指王浩信靚仔好多：「佢仲高我10cm，我畀人話似桂綸鎂同陳茵媺。」Juzco笑言陳豪肯定好鍾意Louis，Juzco自誇喺業界出名係「童顏巨乳」，

王賢誌覺得自己台型最吸引，佢坦言細個被梁朝偉吸引，曾對吳家樂有好感，不過王賢誌未有進一步行動，做朋友已經有sweet嘅感覺，Carson則喜歡彭宇晏及朴寶劍。

Louis拍完呢個節目同屋企人關係好咗，最大得著係鼓勵其他人走出第一步，Juzco見播出後評價幾好，令佢跨越情緒問題、冇咁大壓力，增加信心，佢哋更成日約出嚟見面。

有情歌王子之稱嘅周興哲Eric，嚟緊2月將會嚟到香港，舉行首次個人紅館演唱，呢日Eric接受《StarTalk》嘅訪問，同主持 Edmond許文軒 傾下近況。

自言已經好耐冇嚟香港嘅Eric，指因為之前疫情嘅關係，好多事都要被逼暫停，而隨住疫情緩和，2023年剛開始，佢就決定要嚟香港開演唱會，而且仲要係挑戰紅館嘅四面台，Eric話最難嘅係唔可以令場面有冷場，但開心嘅係因為佢喺正場館嘅中間，可以用觀眾縮短個距離。

之前做巡迴演唱會嘅時候，Eric有一個脫上衣嘅環節，Edmond問佢今次紅館演唱會唔會keep返呢一part？Eric話因為之前去渡假時太放鬆，唔覺意食多咗肚仔變大咗，當佢放完假返嚟，Eric嘅經理人同佢講要準備脫上衣，佢先嚇然記起呢件事，所以當時一個星期有4日都會去做gym，Eric指修身過程最辛苦嘅係喺食嘢方面，因為要食得好清淡，只可以食雞肉同蔬菜，又唔可以食澱粉，Eric話雖然改變咗好多，但係佢都好開心可以了解到點樣令自己健康又快速咁瘦落嚟。Eric話自己係一個貪吃嘅小孩，嚟到香港呢個美食天堂有好大引誘，好似當日做訪問前佢記已經食咗碗牛腩麵，好在有經理人同做共犯，先令佢冇咁大罪惡感呀。

對於被封為情歌王子，Eric就話呢個封號幾有型，仲話情歌一直係佢好鍾意創作嘅歌曲，加上可以做王子，佢就覺得幾帥喇！唔少歌迷大都話聽完Eric嘅歌之後，會被佢把聲感動到，Eric話其實有時自己都會被自己所感動，佢仲以「恐怖」嚟形容自己嘅歌詞，話有時真係會陷入當中好有共鳴。問到如果硬要佢揀一首歌最能夠打動到自己，Eric話每一首都係佢嘅小寶貝，所以好難揀，但如果硬要揀，佢會話《你不屬於我》係佢唱起嚟最有感覺，因為首歌嘅旋律唱起嚟好傷感呀。

Eric又分享自己創作歌曲嘅靈感，仲話當中《怎麼了》嘅副歌係喺佢沖涼嘅時間創作出嚟嘅。至於講到影響佢最深嘅前輩歌手，Eric話一定係周杰倫呀！仲話自己小學時候已經好鍾意聽對方嘅歌，視對方為一個榜樣，而香港歌手方面，佢就話好鍾意張學友同方大同喇。

早前Eric憑電影《我吃了那男孩一整年的早餐》而提名金馬獎最佳新演員演員，亦因為咁而令Eric暫時比較偏向鍾意演戲，仲話希望未來可以演多啲好嘅電影呀。