輕．功｜已故徐忠信劇中現身演武師 十一不捨過世太太悽然感觸

身為三屆視帝嘅 黎耀祥 喺正在播出嘅《輕．功》再有深情演出。劇情中有劇組租用「凌波大廈」 拍電影，其間十一重遇當年任武師時嘅伙伴 徐忠信 ，獲對方邀請出山做替身，幾經掙扎後十一最終答允。

戲中戲其中一場「老婆靈魂離開」場面，男主角因故未能拍攝，十一自薦幫女演員 王嘉慧 對戲，又拎住劇本深情讀出：「你留喺度又好離開都好，我都唔驚，因為你已經係我嘅一部分，我唔會忘記你，亦都唔需要忘記你……你走啦， 我哋將來一定會再見，只係呢一刻我哋要分道揚鑣，個天要我留低，一定係有原因……你唔使等我，我曉飛架嘛，我到時一定會追番你……再見喇老婆……」

除咗已故資深武打演員及武術指導 徐忠信 客串演回老本行武師，亦引起觀眾關注同時大表惋惜。祥哥嘅對白撞到正經歷喪妻之痛嘅十一內心感受， 呢場一分鐘獨白戲演繹深情，欲哭又止嘅表情更令唔少觀眾心痛。

祥哥受訪時指呢場戲要做足功課背熟對白，因為情緒唔能夠斷開，佢話：「拍之前係咁諗點樣去演，每次睇劇本都係覺得好感動，到正式拍嗰時決定擺低劇本，因為驚睇得多反而冇咗新鮮感。」

呢集尾段祥哥一場跳上神壇嘅動作戲，原來亦係親身上陣：「其實預備咗替身去做，但發覺好易穿崩，我就提議自己做番，吊威吔對我嚟講唔陌生，以前都吊好多，為咗出嚟效果好啲，可以自己應付都盡量去試。」

祥哥又提到十一呢個角色比較「平」，但係反而更難演繹：「收到劇本時個諗法係少啲表演，盡量用第一身感受去演個角色，希望可以放大個感受嚟感染觀眾，拍呢套劇最大難處，係擔心做得少又可能太少，做得多又可能太多，要恰到好處。」

劇集探討唔少親情同人生哲理，祥哥亦直言非常感觸：「好似預演自己人生下半場咁，一嚟自己都係戲行嘅人，二來自己有番咁上下年紀，始終有一日要面對自己伴侶嘅離開，面對自己好孤獨嘅人生。同埋劇中描寫咗好多新舊時代嘅對比，亦都探討咗人與人之間嘅相處，以前嘅社會大家比較親切， 依家就比較疏離，科技愈發達，人嘅距離就愈嚟愈遠。」