黎明寒流下舉行戶外演唱會 欣宜瞓地演出望儲齊四大印花

雖然呢幾日寒流襲港，但係中環海濱嘅氣溫，就因為黎明嘅時裝 X 演唱會而變得非常熾熱，仲吸引到唔少圈中人嚟捧場，好似有大小姐林淑敏、Chantel姚焯菲、Windy詹天文、潘靜文、文凱婷、林智樂等嚟捧場。

演唱會開始前先上演Vivienne Tam嘅時裝騷，而穿插喺 Model 當中打頭陣獻唱嘅王丹妮，更將現場氣氛炒熱。而為咗配合fashion show嘅元素，Leon亦特別着返當年拍攝電視劇《原振俠》件皮褸登場，唱完一輪金曲之後，就問台下觀眾凍唔凍，聽到觀眾歡呼聲，Leon就話：「有咁多人唔凍嘅。」

騷後王丹妮就話自己作為一個演員，可以喺咁大個場演出覺得好榮幸，加上可以用自己把聲嚟獻唱，令佢覺得係一個好新奇有趣刺激嘅體驗呀。而同樣係擔住Leon個唱嘉賓嘅Joyce鄭欣宜，就話因為知道係黎生親自點名邀請佢嚟做嘉賓，所以Joyce就決定落力瞓身演出，佢仲話自己已經準備好收Leon嘅金句，但同時亦擔心自己會聽唔明。之後Joyce又話經過今日之後，人生嘅bucket list多咗一項，就係要儲齊四大印花，同四大天王同台演出呀。