《聲夢2》學員齊集拍聖誕MV 漫天飛雪氣氛浪漫溫馨

《聲夢傳奇2》順利舉行音樂會，呢個月佢哋又有新搞作，一眾學員齊集拍聖誕《滿滿小確幸》MV，呢首歌係由Duncan侯雋熙同Zayden彭家賢操刀創作，佢哋喺漫天飛雪嘅聖誕場面下拍攝，眾人玩得好開心，以一身聖誕裝扮圍埋唱歌玩樂器，大家都覺得聖誕節係一年裡面最鍾意嘅節日，因為氣氛好又收到禮物。

Jasmine任暟晴坦言參賽後，工作變得好忙，盼新一年有足夠睡眠時間，而Janees黃洛妍希望創作更多歌曲，想有一首屬於自己嘅歌，Sabrina趙紫諾則喜歡跟朋友聖誕歡聚。

Duncan同Zayden呢日分享歌曲創作嘅背後故事，Duncan指好耐之前已作咗呢首歌，本身係普通話版本，近排畀Zayden試吓填廣東話版本，填咗一首傷心失戀版嘅聖誕歌，Duncan表示：「交咗出去，佢哋話想要一個溫馨版嘅聖誕歌，Zayden兩日之內起咗貨。」Zayden笑指幸好有Duncan有幫手修改用詞。

Maggie趙頌宜早前因家事飛往美國，未能參與11月音樂會，呢日終於歸隊，Maggie唔介意被Mandy孫衣文笑佢肥咗，佢先係O嘴幾秒，之後Maggie笑言自己花名叫「肥趙」；XiX入圍新人獎，佢哋感謝歌迷支持，更會努力向《聲夢》師姐After Class學習，希望不斷進步。