中年好聲音丨吳大強五燈直入25強 梁家賢大方祝福梁浩銓晉級

星期日(18號)播出《中年好聲音》新一輪晉級戰，共有13名選手上陣，吳大強、劉智衛及梁浩銓等順利晉級25強。

年紀最大嘅參賽者「Bill哥哥」吳大強唱《Oh, Pretty Woman》贏得5盞燈順利晉級，直入25強，呢日吳太到現場支持，令吳大強信心大增，吳大強謙虛稱好彩，感謝評判認同佢嘅唱法，亦覺得揀歌啱唱好重要，兒子吳偉豪喺隔籬廠拍完《愛‧回家之開心速遞》即過嚟探爸爸，得知爸爸吳大強晉級，佢都戥爸爸開心，順道帶父母遊電視城，再一齊食嘢。

呢一輪晉級戰攞兩至四燈嘅參加者即場挑選對方，進行一對一淘汰賽，「紅美人」李泇霖同劉智衛實力叮噹馬頭，李泇霖唱《珍重》對戰劉智衛自彈自唱《You Raise Me Up》，兩人同獲三燈，最終要評判再次投票，最終由劉智衛晉級，而李泇霖自認選對手失策，不過佢亦接受呢個賽果，同時感謝評判畀咗好多寶貴嘅意見，又開心老公、奶奶及屋企人支持。

梁浩銓因比賽前喉嚨不適影響表現，被評判指演出失準，梁浩銓認同唱《阿士匹靈》表現不夠好，綵排嗰陣已唱唔到，對手梁家賢因整親手指未能自彈自唱，臨時要換歌，佢傾力唱《幸福摩天輪》，最終二人均得到兩盞燈，由評判再撳燈決定去留，梁家賢喺對抗賽落敗未能晉級，更大方祝福梁浩銓。