周星馳稱法鬥愛犬Kio世界盃貼中阿根廷發咗達女網民示愛：Kio缺不缺媽咪？

星爺周星馳日前曾問法鬥愛犬Kio(凌凌玖)支持法國定阿根廷球隊，結果愛犬選擇阿根廷，12月18號冠軍賽，阿根廷成為今次世界盃冠軍，噚日星爺貼出愛犬Kio嘅近照，見佢得到好多獎勵，原來係估中阿根廷球隊勝出，得到星爺美食獎勵。

法鬥愛犬Kio選擇支持阿根廷，星爺更指：「信你bro ! 一於瞓身All in !」

照片見Kio被美食圍繞，不過最重要係星爺想為愛犬搵另一半：「Kio 貼中波發咗達！想話成家立室！大家有冇靚女介紹？」
不少網民稱最想係睇星爺自己成家立室。

愛犬世界盃貼中阿根廷，周星馳決定幫Kio搵另一半。

另有網民建議星爺帶Kio去愛協選妃，順道可以送個「套餐」畀Kio，當星爺本尊反問係咩套餐，網民即搞笑指係當年《破壞之王》嘅「抵抗沖喜失戀套餐」。
有網民留言問自己嘅黑白色法虎靚女「小丸子」係咪OK，星爺回覆：「Kio流晒口水，問點樣聯絡！」更有女網民趁機曲線示愛：「Kio缺不缺媽咪？」
不少網民紛紛留言，希望得到星爺回覆。