StarTalk丨MC張天賦開騷留座給離世爸爸欣賞 強忍淚水免影響唱歌

StarTalk丨MC張天賦開騷留座給離世爸爸欣賞 強忍淚水免影響唱歌

MC張天賦首次舉行紅館個唱在即,三場紅館騷門票火速售罄,佢回想一開始得知公司入紙申請紅館期呢個消息,仲以為公司開玩笑,後來公司同MC講已確認日子,MC頓時覺得好驚喜,同時承受壓力頗大,MC坦言出道唔耐,自己歌又唔夠多,缺乏壓台經驗,笑言要向好兄弟洪嘉豪取經睇吓屆時喺台上點講笑話搞氣氛,又想要求洪嘉豪喺換衫時間,由好兄弟上台幫手助興搞氣氛。

MC又指台上唱歌看似信心十足,內心其實有少許淆底,佢覺得要請教師姐陳蕾嘅台風及唱歌忘我境界,從中學習唔怕怯場,講今次個唱《This is MC》個名由來,MC稱靈感來自新歌《OVERKILL》,希望向觀眾呈現不同面向,佢笑指擁有多重人格:「有時我係好怕醜、有時好狂妄、有時似3歲嘅MC,有好多唔同人格,嗰個人格要出嚟就出嚟,我都好樂在其中,喺舞台上幾好,有啲效果!」

MC早前拍《OVERKILL》MV第一個shot已不慎扭傷腳,20個鐘要忍痛完成拍攝,佢汲取呢個教訓,之後MC喺跳唱特別留意揀服裝同鞋款,講到MV造型嘗試暗黑風格,MC笑指冇偶像包袱,平時唔介意post啲醜樣相,日後亦可以喺工作挑戰唔同造型。

MC多謝「賦二代」入場支持,期待跟「賦二代」分享紅館舞台,MC表示:「冇佢哋支持,成就唔到今日嘅我,可能最後一場會喊,最後一場唔喊等幾時,我會盡自己全力畀一個最好嘅performance佢哋。」

此外,MC經典歌《記憶棉》、《小心地滑》、《老派約會之必要》等,佢同監製徐浩合作無間,彼此幾了解性格,可以從中指點對症下藥,希望大家喺紅館路上一直行落去;MC開騷亦有留座給離世嘅爸爸:「每一個演唱會,我都有留一張飛、留一個位置畀佢,到時佢會睇到紅館嘅演出,我承諾過佢嘅嘢,我有好畀心機去做,嚟緊一定會繼續努力,當初未去到紅館,能夠出到第一首自己嘅歌,建立自己嘅fans group、上台獲獎,好想同佢分享,相信喺某一邊嘅佢一定會聽到同知道。」

Do姐無奈被AI冒名行騙 洪嘉豪一句篤中笑穴開心晒

Do姐 鄭裕玲 向來深得網民歡心又好有公信力,最近就被不法之徒睇中這點,利用AI製作冒名認佢嘅廣告片行騙。好在唔少醒目Fans都即刻私訊通知Do姐,而Do姐亦即時發聲明澄清自己冇做過金融產品代言人以正視聽。

呢日Do姐同洪嘉豪出席環保活動時,都再一次呼籲大家唔好受騙:「我咁多年都唔會做一啲叫人投資嘅代言,可能我平日都多做訪問,於是有人用AI製作假廣告,條片完全唔似我,大家千祈唔好受騙。」

同樣擔任大使嘅 洪嘉豪 近排積極為4月處男紅館個唱做準備,講到練舞呢個部分,嘉豪忽然篤中咗Do姐嘅笑穴,搞到Do姐笑唔停,因為嘉豪自稱舞技精湛係「掛名華納舞王」,嘉豪之後繼續放笑彈話:「我誠意邀請Do姐睇騷,如果佢有需要中途離場嘅話,我都OK,佢到經已係我嘅榮幸。」 短短嘅一句經已展示咗嘉豪嘅急才同滿滿嘅『求生慾』。

 相關推薦

熱門搜尋