投訴張敬軒拍打戲唔留力 王菀之被打至全身瘀傷

回復自由身成為獨立歌手嘅王菀之，早前接受鐵路公司邀請為吉祥物聲演兼唱主題曲，呢日佢就去參觀呢架全新吉祥物列車，已經有幾年冇飛嘅Ivana話一行入呢架列車，就即刻有種去旅行嘅感覺，不過問到佢嚟緊有冇外遊嘅打算？Ivana就話2023年嘅Schedule已經排滿晒工作，不過好在有啲工作係佢要飛去日本同美國拍攝同做音樂會，令佢可以止一止個外遊癮呀。

講到佢回復自由身之後，喺2023年同管樂團合作嘅演唱會，門票一開賣就已經賣出九成，Ivana話驄到呢個消息好開心，因為佢話今次演唱會性質同過往嘅唔同，係以古典音樂為主，所以見到個銷情咁好佢都好驚訝。

嚟緊同張敬軒合作嘅電影將會喺賀歲檔上影，Ivana就話自己相當期待，佢仲笑言戲中同軒公嘅武打動作，係同現場武指示範嘅動作完全唔同，Ivana又投訴同軒公拍打戲嗰陣，對方完全冇就位，結果打到佢全身有多撻瘀傷呀！