張家輝新片力邀陳法拉返港 朱晨麗貼同日生家輝合照

由張家輝自編自導自演嘅新片呢日舉開鏡儀式，近年主要喺外地發展嘅 陳法拉 仲被佢誠意打動而重返香港參演一角，呢日佢哋就同有份演出嘅 朱晨麗 許恩怡 劉俊謙 袁富華 齊齊切燒豬祈求拍攝順利喇。

法拉仲話一直都希望拍攝港產作品，仲話今次角色突破又有發揮，仲話同過往嘅自己好唔同喎。而家輝就話用足誠意之餘，都要靠劇本同故事嚟打動對方呀。不過要同老公囡囡分隔兩地，對法拉嚟講就係比較大嘅辛苦之處喇。

一返嚟食咗大堆美食嘅佢，又話要同唔少朋友道歉，因為拍攝日程影響，要稍後先可以再約大家見面喇。至於12月2號度過35歲生日嘅Morning朱，今次同家輝呢位同日生日嘅拍檔合作， 所以就特登貼出一張壽星仔女合照，仲話估計大家性格好接近，一樣會為工作勇往直前呀。

曾經被形容為仙氣滿瀉嘅柏安妮千金Nataliee，雖然入行已經一段時間，不過拍戲就仍然係初哥，呢日佢就話自己有向媽咪請教，仲話媽咪陪佢去現場見返當年合作嘅工作人員非常開心呀。

近日被爆出快將同拍拖多年女友結婚嘅袁富華，呢日就搞笑話為咗避免有人搶婚，所以一切非常低調，其實都係因為愛錫圈外人太太，希望大家為佢保持返平靜生活咁話喎。