TVB台慶劇《輕.功》主打小品故事,溫馨貼地劇情引發觀眾共鳴,更於內地豆瓣網獲得7.7分,成績不俗,噚晚嗰集講到志威(韋家雄飾)希望圓夢再拍電影《輕功》,遂鼓起勇氣面對當年因該片種下心結嘅吳錦賢(歐瑞偉飾),求對方出山完成劇本,惟錦賢以江郎才盡為由予以拒絕,志威改以激將法,鬧錦賢係縮頭烏龜,兩人因此大打出手,十一(黎耀祥飾)出面勸交,無辜硬食錦賢「兜錘窩面」。
歐瑞偉今年劇接劇,先後參演《鐵拳英雄》、《金宵大廈2》、《黯夜守護者》、《超能使者》、《輕.功》及即將播出嘅《有種好男人》,喺《鐵拳》及《超能》中飾演大反派,表現亮眼,贏盡好評,歐瑞偉今次喺《輕.功》角色有別以往、更考演技,相對比較文靜、內心戲較多,歐瑞偉從演經驗多年,對大部分角色輕鬆駕馭,展現出文質彬彬一面,獲網友大讚演乜似乜。
歐瑞偉受訪時歸功於劇本寫得好:「呢個角色唔難演嘅,因為都唔多出聲,都係跟住劇本嚟演。其實錦賢背後有個故仔,以前佢鍾意咗個當紅女演員,後來女演員同咗第二個人結婚,但一切只係佢一廂情願,呢個心結埋藏咗喺佢心入面好多年。」歐瑞偉形象百變,演奸又得演忠又得,仲係龍虎武師出身,早前喺《愛.回家之開心速遞》更表演後空翻,年屆61歲依然身手敏捷,十足後生仔。
歐瑞偉喺劇中再開金口唱歌:「唱番自己熟悉嘅歌,難度唔算高,但都係要練吓歌,同埋我冇乜唱歌癮,因為始終唱歌唔係叻,出去登台來來去去都係唱嗰幾首。」講到「凌波大廈」街坊關係密切似足一家人,歐瑞偉笑言:「大家本身都好熟,所以開工時都好輕鬆,最好笑係韋家雄同埋楊卓娜,佢哋兩個成日喺度扮到狗咬狗骨,搞氣氛氹大家開心!」
《輕.功》 逢周一至五晚九點半翡翠台播映