張偉文70歲生日 眾星好友為壽星公賀壽

12月21號係靚聲王張偉文70歲生日，經理人方俊為佢開派對慶祝，好友陳友、魯振順、劉雅麗及Joe Junior等到場祝賀。

張偉文先多謝歌迷，佢嘅生日願望係想繼續開騷，呢日見張偉文面露倦容，經理人方俊強調對方身體無礙：「佢其實身體OK，不過佢今日比較眼瞓，可能佢喺院舍個瞓覺時間較早，晏晝就好精神，夜晚就比較攰，而家冇晒電。」

張偉文兩年前開始入住護老院，歌迷朋友都想知佢喺護老院嘅情況，方俊指張偉文喺嗰度住有時悶啲：「最開心有朋友去探佢，同佢出去飲吓茶，佢就最開心，我個個禮拜都有同佢出去飲茶，每個節日都會出去食飯，冬至做完節目，就會同佢一齊做節。」