輕.功|Chloe撇翊風閃嫁富二代 Joman朱晨麗合唱歌喉不俗

輕.功|Chloe撇翊風閃嫁富二代 Joman朱晨麗合唱歌喉不俗

《輕.功》23號晚一集故事劇情可以話峰迴路轉,聲稱因小產決意同翊風 朱敏瀚 飾分手嘅 Chloe,原來一直講大話。唔止根本冇小產,仲喺分手後閃電同有錢仔Benjamin 周志康 飾結婚。綠帽被兜頭笠嘅風仔喺Chloe出嫁當日,仲可以非常冷靜咁問對方BB邊個經手,而Chloe 聞言後只徐徐吐出一句:「對唔住……」

拜金Chloe講完大話再閃嫁,可惜點喊都未獲同情

正當大家以為「拜金」Chloe得償所願時,點知佢又喊晒口問幫佢化新娘妝嘅Yuki 朱晨麗 飾自己係咪好衰,Yuki聞言就話:「人係自私嘅,只要你覺得做嘅嘢對得住自己同BB就得,唔使同其他人交代。」

雖然Chloe喊完又喊,不過就梗係唔得觀眾同情啦,因為佢嘅港女行徑早已辣㷫唔少網友,除咗拜金又嚴重公主病要男友服侍周到,加上大話連篇,難怪唔少網友都睇唔過眼喇。

呢集另一焦點係 蔣祖曼 同 朱晨麗 合唱《The Best is Yet to Come》,原來佢哋演得之餘亦非常唱得,Joman今次仲係首度喺劇集獻聲:「因為我哋係入錄音室錄,知道唱得唔好可以唱多幾次。同埋因為我唔係歌手,所以冇咩包袱,盡咗力就可以!」Joman又笑言要苦練唱功:「咁橋我想學一樣新技能,於是拍劇時我問陳豪意見,佢話唱歌係最基本一定要學,因為好多活動、表演都可能需要唱歌。」

Joman同朱朱一齊安慰綠帽由頭笠到落腳嘅朱仔

而Joman又唱今次唱嘅《The Best is Yet to Come》甚有淵源:「首歌係我人生第一部參演電影嘅主題曲,所以好有熟悉感,呢首歌陪伴咗我好多年,對我嚟講意義重大。」 而同佢喺劇中一時糖黐豆一時水溝油嘅Morning,現實中其實相當老友,Joman話:「朱朱係好獨立、好犀利嘅女仔,佢自己一個喺香港生活,真係好佩服佢。同埋佢成日都好照顧我,有時祥哥萬歲消夜,佢會提我打包個湯做早餐,佢係我入TVB後第一位女演員好朋友,對我嚟講意義重大,就算完咗套劇我哋都有keep住聯絡同約出嚟食飯。」

佢哋除咗合唱同合演之外,仲成為好朋友

逆天奇案2|金牌監製劉家豪率眾演員為榮休作宣傳 劉佩玥向觀眾拋線索破身份之謎

TVB新劇《逆天奇案2》即將喺下周一(1號)晚8點半首播,宣布7月榮休嘅金牌監製劉家豪率領陳展鵬、馮盈盈、黃智賢、蔣祖曼、張頴康及劉佩玥(Moon)等一眾演員現身商場進行宣傳。《逆天奇案》收視叫好叫座,所以將《逆天2》視為收山作嘅家豪哥好有壓力,仲話繼承上輯精神,扭盡六壬令觀眾追住睇。展鵬透露劇情將更加精彩,節奏仍然緊湊刺激。

家豪哥入行多年創作過唔少經典作品,即將要退下火線,當然會有不捨心情。所以家豪哥都話一家四口呢次會喺劇中出現以作紀念。家豪哥更喺結局埋下彩蛋,預告林夏薇嘅一句對白係自己向天下有情人講嘅一句話添!

至於講到退休生活,家豪哥就會同老婆梅小青展開郵輪旅行渡假,佢哋因唔捨得一對孫仔,所以佢哋決定分段式旅行,家豪哥亦期待日後弄孫為樂嘅生活。

阿Moon同張頴康呢對反派夫妻喺上一輯收穫唔少觀眾喜愛,雖然阿Moon角色已經死咗,但係佢呢次仍會參與演出。而阿Moon亦向觀眾大拋線索,叫大家用第一輯海報同第二輯做對比,喺眼神同服飾上可以搵到解謎答案。蔣祖曼同黃智賢雖然繼續做一對,但二人感情就遇到唔少危機,更有「最強第三者」出現!

《逆天奇案2》周一至五晚8點半翡翠台播出

 相關推薦

熱門搜尋