中年好聲音｜參賽猛人雲集錄新歌MV 陳早怡顏志恒為眾戰友送大餐

TVB歌唱節目《中年好聲音》令一眾唱得之人喺舞台燃起心中嗰團火，再次發光發亮，勇敢追夢，呢日一眾參加者為新歌《我們的名字》拍攝MV，各人台風十足，唱跳入型入格，一班參加者覺得參加比賽最難能可貴係識到一班志同道合嘅朋友，一眾參賽者嘅友誼非常濃厚。

「Uncle Bill」吳大強非常感謝排舞老師十分有耐性，耐心教導眾人學識跳舞，「紅美人」李泇霖盛讚Uncle Bill好犀利：「前嗰幾日由六點練到夜晚超過11點，Uncle Bill係不停係咁練。」李思林則早前冇參與排練，不過佢好快「上手」學識，眾人默契十足。

拍攝當日適逢就嚟到聖誕節，陳早怡為眾戰友送上大餐，預早慶祝聖誕節，周吉佩、曹敏寶及支嚳儀受訪時感謝陳早怡送上自製嘅聖誕特飲，陳早怡笑言因為鍾意聖誕節，所以逼大家陪佢慶祝，而顏志恒預早時間到會客室，靜靜地炮製美食，給予眾人驚喜，眾人甫見到顏志恒推餐車出來即驚喜歡呼，柳冕、應德榮及鮑聖光大讚顏志恒煮得好好食。