因為愛情｜Boxing Day首播分享無私真愛 虛無但堅實故事溫暖人心

由 連詩雅 主持嘅全新節目《因為愛情》同大家一齊探討吓「為咗愛情，可以去到幾盡？」Shiga尋訪12個特別愛情故事。當中有人為愛情放棄麵包，抱住「雖千萬人吾往矣」嘅決心、亦有花費精力照顧三名小朋友嘅夫婦，驀然回首想尋回戀愛感覺、有人為愛情改變宗教信仰、亦有不離不棄的愛，面對患有絕症嘅另 一半，盡力令對方無憾。故事平凡但一啲都唔簡單，希望觀眾體會愛情嘅偉大，可以跨越時間、 地域甚至生死。 

Shiga初次為15集節目擔任主持，佢提到由12位嘉賓身上，見到佢哋獨特嘅一 面，但係亦有一共通點︰「佢哋經歷患難而不離不棄，互相成長同包容。」Shiga笑言每次都抱住戰戰兢兢嘅心情開工，得着係體驗到無私嘅愛，佢話︰「細個會享受被愛護嘅感覺，依家覺得愛情係要互相付出、扶持，可以少啲計較、挑剔，學曉欣賞， 而溝通同諒解係好重要。」

節目中Shiga會同故事嘅主人翁打成一片，今年7月佢陪住港女阿恩同兩個女兒，飛到台灣同老公Jason團聚。因為疫情同工作關係Jason已經兩年半冇返港，今次係一家四口難得重聚咚山嘅大日子，仲拍婚紗照兼全家福。Shiga全程參與感受佢哋嘅喜悅。

Shiga陪阿恩帶兩位囡囡到台灣，直擊同老公Jason團聚嘅幸福時刻

至於最打動Shiga嘅故事，當中兩個就特別深刻︰「其中一個故事嘅女主人翁Tiffany患咗癌症，佢真係今日唔知聽日事，但係佢選擇咗用一個好積極嘅態度，同另一 半Jeff去面對。」Jeff 喺節目中講過一句「愛是當『我』變成『我們』」令Shiga感受良 多。

患癌嘅Tiffany選擇同男友Jeff以笑積極面對每一日

另外一對係Carmen同 Eric嘅故事，Eric年輕時對Carmen一見鍾情，開始拍拖。 但係好景不常，Carmen喺澳洲讀書時遇上車禍，導致頸椎以下不能活動。Eric堅定嘅愛始終如一，但係就被Carmen父母反對，擔心Eric反悔令女兒受到二次傷害。事實證明22年間Eric嘅照顧無微不至，Shiga話︰「嗰種不離不棄、兩人眼神間流露出相互嘅感染力，喺剪片嘅時候睇返，都會喊多次。」

Eric同Carmen歷經22年比一般人更為艱辛嘅感情路
《因為愛情》12月26號起 星期一至五晚 22:30 J2(82台)