鄧智堅憑《下流上車族》飾演車總老友關細孝，人氣上升，由舞台劇出身跳入電視台拍劇，日前接受TVB娛樂新聞台《星光路上》主持人潘盈慧訪問，佢坦言自細培養出演藝興趣，習慣喺屋企一人分飾多套卡通片嘅角色，佢笑言以前已經一個人「好聲好戲」玩聲演。

鄧智堅喺中學開始參加戲劇演出，加強對戲劇藝術嘅認知，最終得到香港演藝學院取錄，因成績優異而取得傑出學生獎，後來佢覺得工作上要轉變，怕再過幾年遇上樽頸位，慢慢減產舞台作品，希望去其他平台試吓，機緣巧合下入咗TVB發展，拍綜藝節目《最緊要好玩》，鄧智堅首次拍劇係《使徒行者2》飾演古惑仔「曾石」，要喺劇中毫無情緒咁講一段好長嘅口供。

鄧智堅最難忘有兩個角色其中一個係《青春不要臉》演電視台藝員部經理「合哥」，初期開工當中喺一日內要拍12場戲，鄧智堅坦言嗰日係打大佬：「當監製、導演對你有信心就可以，佢夠膽12場都有你，好刺激！」鄧智堅另一個難忘角色係拍《下流上車族》，令佢覺得喜出望外，見到班底就知好刺激，且角色好有發揮，鄧智堅表示：「做林敏驄好兄弟，我年紀差唔多，生出一個廿幾歲嘅仔，喺造型上要做啲嘢，驚畀人話我扮老，最後知道劇集收視好好，網上好受歡迎，好開心！」

鄧智堅今年入圍萬千星輝頒獎典禮3個提名，佢非常感恩終於畀大家見到佢嘅努力，亦希望有機會攞獎，嚟緊佢想試吓挑戰唔同嘅劇種。

蔡潔 最近憑TVB熱播劇《一舞傾城》飾演「Monica」成功彈起，日前接受TVB娛樂新聞台節目《星光路上》，與主持 潘盈慧暢 談佢由導演系畢業到嘗試做幕前演出，一步一步走上演藝路！

蔡潔加入邵氏拍第一套劇《飛虎之雷霆極戰》，與黃宗澤及吳卓羲有不少對手戲，佢最難忘就係《拳王》其中一幕要拎隻烏龜搵張振朗，佢坦言驚烏龜拎住已經喊咗出嚟，蔡潔拍《一舞傾城》喺造型上有留意八、九十年代打扮，蔡潔認為入行經歷尚算順利，靠自己獨立生活，今年係佢喺香港發展第10年，佢識咗好多朋友，又遇到好好嘅班底，對自己喜愛嘅行業又熟悉咗。

蔡潔離開屋企人身邊一段時間，目前佢搬咗去一個好啲嘅地方，等家人可以多啲嚟香港住，蔡潔又指結婚冇得plan，佢曾喺30歲好多計劃，後來佢覺得所有事都係順其自然！